ସାମ୍ବାଦିକ ରାଜୀବ କୁମାର ବେହେରା
ତାରିଖ-୧୪-୦୩-୨୦୨୬
ମୟୁରଭଞ୍ଜ: ଓଡ଼ିଶାର ମାଟି ସଦା ସୃଜନଶୀଳତା, କଳା ଓ ପ୍ରତିଭାରେ ସମୃଦ୍ଧ। ଏହି ମାଟିରୁ ପୁଣିଥରେ ଉଦୟ ହୋଇଛନ୍ତି ଜଣେ ଅସାଧାରଣ ପ୍ରତିଭା। ସାଧାରଣ ଏବଂ ଅଦରକାରୀ ମନେ ହେଉଥିବା ନଡ଼ିଆ ସଢ଼େଇ ଖୋଳକୁ ଅପୂର୍ବ କଳାରେ ପରିଣତ କରି ନୂଆ ଇତିହାସ ରଚିଛନ୍ତି ବିଜୟ କୁମାର କମିଳା। ତାଙ୍କର ଅଦମ୍ୟ ପରିଶ୍ରମ, ଧୈର୍ଯ୍ୟ ଓ କଳ୍ପନାଶକ୍ତିର ଫଳରେ ସୃଷ୍ଟି ହୋଇଛି ୫୩ଟି ଅନନ୍ୟ ହସ୍ତନିର୍ମିତ କଳାକୃତି, ଯାହା ତାଙ୍କୁ India Book of Records ରେ ସ୍ଥାନ ଦେଇଛି। ମୟୁରଭଞ୍ଜ ଜିଲ୍ଲା ଉଦଳା ମେଣ୍ଢାଖାଇ ଅଞ୍ଚଳର ନିବାସୀ ବିଜୟ ପେଶାରେ ଜଣେ ବାଇକ୍ ମିସ୍ତ୍ରୀ। ଖରାପ ବାଇକକୁ ନୂଆ ଜୀବନ ଦେବା ତାଙ୍କ ପେଶା ହେଲେ ମଧ୍ୟ, ତାଙ୍କର ନିଜସ୍ୱ ନିଶା ହେଉଛି ସୃଜନଶୀଳ କଳା। ଖାଲି ସମୟକୁ ନଷ୍ଟ ନକରି ସେ ନଡ଼ିଆ ସଢ଼େଇ ଖୋଳରୁ ବିଭିନ୍ନ ଆକର୍ଷଣୀୟ ଓ ସୂକ୍ଷ୍ମ କଳାକୃତି ତିଆରି କରିଥାନ୍ତି। ତାଙ୍କ ହାତର ସ୍ପର୍ଶରେ ଅଦରକାରୀ ବସ୍ତୁ ମଧ୍ୟ ଜୀବନ୍ତ ରୂପ ନେଇଥାଏ। ତାଙ୍କ ତିଆରି କଳାକୃତିମାନଙ୍କ ମଧ୍ୟରେ ଫାଇଟର ଜେଟ୍ର ଆକୃତି, ଭାରତର ମାନଚିତ୍ର, ଡାକଟା ବିମାନ, ଛୋଟ ଗଣେଶ ଓ ଜଗନ୍ନାଥଙ୍କ ମୂର୍ତ୍ତି, ଶୋଭାବର୍ଦ୍ଧକ ଫୁଲଦାନି, ଆଇନା ସହିତ ଚନ୍ଦ୍ରଯାନ–୩ ର ମଡେଲ୍ ସହିତ ଅନେକ ଅନନ୍ୟ କଳାକୃତି ରହିଛି। ପ୍ରତ୍ୟେକ କଳାକୃତିରେ ତାଙ୍କ ସୃଜନଶୀଳତା, ଧୈର୍ଯ୍ୟ ଓ ଅସୀମ ପ୍ରୟାସର ଅଲଗା ଛାପ ଦେଖିବାକୁ ମିଳେ। ବିଜୟ କୁମାର କମିଳା କହିଛନ୍ତି, “ମୁଁ କର୍ମ ଉପରେ ବିଶ୍ୱାସ କରେ। ନିଷ୍ଠା ଓ ପରିଶ୍ରମ ଥିଲେ ସଫଳତା ନିଶ୍ଚୟ ଦିନେ ନା ଦିନେ ଆସିଥାଏ।” ତାଙ୍କ ଏହି ସଫଳତା ପରେ ଚାରିଆଡ଼ୁ ଶୁଭେଚ୍ଛାର ସୁଅ ଛୁଟିଛି। ପରିବାର ଓ ଅଞ୍ଚଳବାସୀ ମଧ୍ୟରେ ଖୁସିର ମହଲ ଦେଖିବାକୁ ମିଳିଛି। ବିଜୟଙ୍କ ଏହି ସଫଳତା କେବଳ ତାଙ୍କ ବ୍ୟକ୍ତିଗତ ଗୌରବ ନୁହେଁ; ଏହା ଓଡ଼ିଶାର ଲୋକକଳା, ପାରମ୍ପରିକ ଶିଳ୍ପ ଓ ସୃଜନଶୀଳତାକୁ ଦେଶ ଓ ବିଶ୍ୱ ସମ୍ମୁଖରେ ଉଚ୍ଚ ସ୍ଥାନରେ ପହଞ୍ଚାଇଛି। ସାଧାରଣ ବସ୍ତୁରେ ମଧ୍ୟ ଅସାଧାରଣ ସମ୍ଭାବନା ଲୁଚିଥାଏ ବୋଲି ସେ ତାଙ୍କ କଳାରେ ପ୍ରମାଣ କରିଛନ୍ତି। ନିଶ୍ଚୟ ଭାବେ ବିଜୟ କୁମାର କମିଳାଙ୍କ ଏହି ଐତିହାସିକ ସଫଳତା ଆଗାମୀ ପିଢ଼ିକୁ ପ୍ରେରଣା ଦେବ ଏବଂ ଓଡ଼ିଶାର ଶିଳ୍ପ ପରମ୍ପରାକୁ ନୂଆ ଦିଗ ଦେଖାଇବ। ତାଙ୍କ ଅଦ୍ଭୁତ କଳାସୃଷ୍ଟି ଓଡ଼ିଶା ପାଇଁ ଗର୍ବ ଓ ଗୌରବର ଅଧ୍ୟାୟ ହିସାବରେ ସଦା ସ୍ମରଣୀୟ ହୋଇ ରହିବ।
