୯୨ ବର୍ଷ ବୟସରେ ଆଖି ବୁଝିଲେ କିମ୍ବଦନ୍ତୀ ଗାୟିକା ଆଶା ଭୋସଲେ
ତାରିଖ- ୧୨- ୦୪-୨୦୨୬
ଚର୍ଚ୍ଚା ବ୍ୟୁରୋ : ବଲିଉଡର ସଂଗୀତ ଜଗତରୁ ଏକ ଦୁଖଦ ଖବର ସାମ୍ନାକୁ ଆସିଛି, କିମ୍ବଦନ୍ତୀ ଗାୟିକା ଆଶା ଭୋସଲେ ସବୁଦିନ ପାଇଁ ଦୁନିଆ ଛାଡିଛନ୍ତି । ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ଘଟିଥିବା ସୂଚନା ରହିଛି। ୯୨ ବର୍ଷ ବୟସରେ ସେ ସବୁଦିନ ପାଇଁ ଦୁନିଆକୁ ଏଲବିଦ କହିଛନ୍ତି ଆଶା। ଆସନ୍ତାକାଲି ତାଙ୍କର ଅନ୍ତିମ ସଂସ୍କାର ଥିବା ନେଇ ଜାତୀୟ ଗଣମାଧ୍ୟମରେ ପ୍ରକାଶ ପାଇଛି । ସେ ବଲିଉଡରେ ଦୀର୍ଘ ବର୍ଷ ଧରି ସକ୍ରିୟ ଥିଲେ। ତାଙ୍କ ମୃତ୍ୟୁ ପରେ ସଙ୍ଗୀତ ଜଗତରେ ଏକ ଯୁଗର ଅବସାନ ଘଟିଛି। ଖବର ଅନୁଯାୟୀ, ଗତକାଲି ତାଙ୍କୁ ହୃଦଘାତ ଯୋଗୁଁ ମୁମ୍ବାଇର ବ୍ରିଚ୍ କ୍ୟାଣ୍ଡି ହସ୍ପିଟାଲରେ ଭର୍ତ୍ତି କରାଯାଇଥିଲା, ଏବଂ ସେ ହୃଦଘାତ ଏବଂ ଫୁସଫୁସ ଜନିତ ସମସ୍ୟା ପାଇଁ ଚିକିତ୍ସିତ ହେଉଥିଲେ। ୭୦ ବର୍ଷରୁ ଅଧିକ ସମୟ ଧରି ବିଭିନ୍ନ ଭାଷାରେ ହଜାର ହଜାର ଗୀତ ଗାଇ ସଂଗୀତ ଜଗତରେ ନିଜର ଏକ ସ୍ୱତନ୍ତ୍ର ଛାପ ଛାଡି ଯାଇଛନ୍ତି। ତାଙ୍କ ସୁରିଲା କଣ୍ଠ ପାଇଁ ସେ ଘରେ ଘରେ ପରିଚିତ ଥିଲେ, ତାଙ୍କ କଣ୍ଠ ସ୍ୱର ଯେତିକି ମଧୁର ତାଙ୍କ ସ୍ଵଭାବ ମଧ୍ୟ ସେତିକି ସୁନ୍ଦର, ତାଙ୍କ ଧିରସ୍ଥିର ସ୍ଵଭାବ ପାଇଁ ମଧ୍ୟ ସେ ବେଶ ଜଣାଶୁଣା
ତେବେ ୧୯୩୩ ମସିହା ସେପ୍ଟେମ୍ବର ୮ ତାରିଖରେ ଜନ୍ମଗ୍ରହଣ କରିଥିଲେ ଗାୟିକା ଆଶା ଭୋସଲେ, ଭାରତୀୟ ସଙ୍ଗୀତର ବହୁମୁଖୀ ସ୍ୱରମାନଙ୍କ ମଧ୍ୟରୁ ଆଶା ଭୋସଲେ ଜଣେ। ଲତା ମଙ୍ଗେସକରଙ୍କ ସାନ ଭଉଣୀ ହେବା ସତ୍ତ୍ୱେ, ଆଶା ନିଜର ପରିଶ୍ରମ ଏବଂ ସୁରିଲା ସ୍ୱର ପାଇଁ ସଭିଙ୍କ ହୃଦୟରେ ନିଜର ଏକ ସ୍ବତନ୍ତ୍ର ପରିଚୟ ସୃଷ୍ଟି କରିପରିଥିଲେ। ଶାସ୍ତ୍ରୀୟ ସଙ୍ଗୀତ ବ୍ୟତୀତୀ ପପ୍, ଗଜଲ ଏବଂ ଲୋକଗୀତ ବି ଗାଇଛନ୍ତି ଆଶା। ସେ ୧୯୫୦ ମସିହାରେ ବଲିଉଡ ଫିଲ୍ମରେ ପ୍ଲେବ୍ୟାକ୍ ସିଙ୍ଗର୍ ଭାବେ କଣ୍ଠଦାନ କରିବା ଆରମ୍ଭ କରିଥିଲେ। ଏହା ପରେ ସେ ଆଉ କେବେ ସଂଗୀତ ଦୁନିଆରୁ ପଛ ଘୁଞ୍ଚା ଦେଇନାହାନ୍ତି। ଅନେକ ସିନେମାରେ ସେ ଗୀତ ଗାଇଛନ୍ତି। ତାଙ୍କୁ ଭାରତର ଦ୍ୱିତୀୟ ସର୍ବୋଚ୍ଚ ବେସାମରିକ ସମ୍ମାନ ‘ପଦ୍ମ ବିଭୂଷଣ’ରେ ସମ୍ମାନିତ କରାଯାଇଛି। ତେବେ କିମ୍ବଦନ୍ତୀ ଗାୟିକା ଆଶା ଭୋସଲେଙ୍କ ବିୟୋଗରେ ସଂଗୀତ ଜଗତ ବ୍ୟତୀତ ସାରା ଦେଶରେ ଶୋକରଛାୟା ଖେଳି ଯାଇଛି। ସଭିଏଁ ତାଙ୍କୁ ଶ୍ରଦ୍ଧାଞ୍ଜଳି ଦେବା ସହିତ ତାଙ୍କ ଆତ୍ମାର ସତଗତି ପାଇଁ ଭଗବାନଙ୍କ ନିକଟରେ ପ୍ରାଥନା କରୁଛନ୍ତି
