ଭୁବନେଶ୍ୱର ::ସ୍ୱଚ୍ଛ ସର୍ବେକ୍ଷଣରେ ପୁଣି ଯୋଡିହେଲା ଆଉ ଏକ ଫର୍ଦ୍ଦ । ଏଥର ଭୁବନେଶ୍ୱର ମହାନଗର ନିଗମ (ବିଏମ୍ ସି)ର ପ୍ରତ୍ୟେକ ଗଳିକନ୍ଦିରୁ ଉଠିବ ବର୍ଜ୍ୟ । ଯେଉଁସ୍ଥାନକୁ ସଫେଇ ଗାଡି ଯାଇପାରୁ ନାହିଁ ସେ ସ୍ଥାନକୁ ଏଣିକି ଯିବ ତିନି ଚକିଆ ସଫେଇ ଟ୍ରଲି । ପୂର୍ବରୁ ସ୍ୱଚ୍ଛକର୍ମୀଙ୍କୁ ଦିଆଯାଉଥିବା ହାତଠେଲା ଗାଡି ବା ପୁସ୍ କାର୍ଟ ବଦଳରେ ବିଏମ୍ ସି ଏହି ତିନି ଚକିଆ ସଫେଇ ଟ୍ରଲି ଦେଇଛି । ସ୍ୱଚ୍ଛ କର୍ମୀମାନେ ଏହାକୁ ପେଡଲ ସହାୟତାରେ ଚଳାଇ ଗଳିକନ୍ଦିରୁ ବର୍ଜ୍ୟ ସଂଗ୍ରହ କରିବେ । ଏହା ଫଳରେ କମ୍ ସମୟ ମଧ୍ୟରେ ଅଧିକ ଗଳିକନ୍ଦିରୁ ବର୍ଜ୍ୟ ସଂଗ୍ରହ କରିବା ସହ ସେଗୁଡିକୁ ଉପଯୁକ୍ତ ଭାବେ ସ୍ଥାନାନ୍ତର କରାଯାଇ ପାରିବ ।
ଏହି ତିନି ଚକିଆ ସଫେଇ ଟ୍ରଲିକୁ ଆଜି ବିଏମ୍ ସି ମୁଖ୍ୟାଳୟରେ ଆୟୋଜିତ ଏକ ସ୍ୱତନ୍ତ୍ର କାର୍ଯ୍ୟକ୍ରମରେ ମାନନୀୟା ମେୟର ଶ୍ରୀମତୀ ସୁଲୋଚନା ଦାସ ଓ କମିଶନର ଶ୍ରୀ ଚଞ୍ଚଳ ରାଣା ଲୋକାର୍ପଣ କରିଛନ୍ତି । ଅନ୍ୟମାନଙ୍କ ମଧ୍ୟରେ ପରିମଳ ଷ୍ଟାଣ୍ଡିଂ କମିଟିର ଅଧ୍ୟକ୍ଷ ଶ୍ରୀ ବିରଞ୍ଚି ନାରାୟଣ ମହାସୂପକାର, ଅତିରିକ୍ତ କମିଶନର ଶ୍ରୀ କୈଳାସ ଚନ୍ଦ୍ର ଦାସଙ୍କ ସହ ବହୁ କର୍ପୋରେଟର, ସ୍ୱଚ୍ଛ କର୍ମୀଙ୍କ ଓ ଟିମ୍ ବିଏମ୍ ସି ଉପସ୍ଥିତ ଥିଲେ ।
ଏହି ତିନି ଚକିଆ ସଫେଇ ଟ୍ରଲିରେ ଓଦା ଓ ଶୁଖିଲା ବର୍ଜ୍ୟ ପାଇଁ ସ୍ୱତନ୍ତ୍ର ଭାବେ ପାର୍ଟିସନ କରାଯାଇଛି । କେବଳ ସେତିକି ନୁହେଁ, ଏଥିରୁ ବର୍ଜ୍ୟ ଢାଳିବା ପାଇଁ ମଧ୍ୟ ସ୍ୱତନ୍ତ୍ର ବ୍ୟବସ୍ଥା ରହିଛି । ତିନୋଟି ଜୋନର 67 ଓ୍ୱାର୍ଡ ପାଇଁ ମୋଟ 44ଟି ଗାଡି ପ୍ରଦାନ କରାଯାଇଛି । ସ୍ୱଚ୍ଛ ସର୍ବେକ୍ଷଣ ଅବସରରେ ବିଏମ୍ ସି ଅଂଚଳର ସବୁ ଗଳିକନ୍ଦିରୁ ଯେପରି ସହଜରେ ଏବଂ କମ୍ ସମୟ ମଧ୍ୟରେ ବର୍ଜ୍ୟ ଉଠିପାରିବ, ସେଥିପାଇଁ ଏହି ବ୍ୟବସ୍ଥା କରାଯାଇଛି । ଅନ୍ୟପକ୍ଷରେ ସ୍ୱଚ୍ଛ କର୍ମୀମାନେ ସମ୍ମାନର ସହ ଏହି ତିନି ଚକିଆ ସଫେଇ ଟ୍ରଲିରେ ବର୍ଜ୍ୟ ସଂଗ୍ରହ କରିବେ ବୋଲି କହିଛନ୍ତି ମାନନୀୟା ମେୟର ଓ କମିଶନର ।
ଚର୍ଚ୍ଚା news
