BY-SUBHASMITA-DT-16.4.2026
ଭୁବନେଶ୍ୱର: କେନ୍ଦ୍ରୀୟ ମାଧ୍ୟମିକ ଶିକ୍ଷା ପରିଷଦ (CBSE) ଦ୍ୱାରା ପ୍ରକାଶିତ ୨୦୨୬ ଦଶମ ଶ୍ରେଣୀ ପରୀକ୍ଷା ଫଳାଫଳ ଏବେ ଶିକ୍ଷା ମଣ୍ଡଳରେ ଚର୍ଚ୍ଚାର ବିଷୟ। ଏହିବର୍ଷ ଓଡ଼ିଶାର ପୁରୀର ମଦର ପବ୍ଲିକ୍ ସ୍କୁଲର ଛାତ୍ରୀ ଟିନା ରଥ ଅପୂର୍ବ ସଫଳତା ହାସଲ କରି ସାରା ଦେଶରେ ଟପର୍ ହୋଇଛନ୍ତି। ସେ ୫୦୦ରୁ ୫୦୦ ନମ୍ବର ରଖି ଏକ ନୂତନ ମାନକ ସୃଷ୍ଟି କରିଛନ୍ତି।
ଏହି ଫଳାଫଳରେ ସାରା ଦେଶର ପାସ୍ହାର ୯୩.୭୦% ରହିଛି, ଯାହା ପୂର୍ବବର୍ଷ ତୁଳନାରେ ସାମାନ୍ୟ ବୃଦ୍ଧି ସୂଚାଉଛି। ଏବେ ବି ଛାତ୍ରୀମାନେ ଛାତ୍ରଙ୍କୁ ଅଗ୍ରଗାମୀ ହୋଇଥିବା ଦେଖାଯାଇଛି। ଦେଶରେ ମୋଟ ୨୪ ଲକ୍ଷରୁ ଅଧିକ ଛାତ୍ରଛାତ୍ରୀ ପରୀକ୍ଷା ଦେଇଥିବା ବେଳେ ୨୩ ଲକ୍ଷରୁ ଅଧିକ ଉତ୍ତୀର୍ଣ୍ଣ ହୋଇଛନ୍ତି।
ଓଡ଼ିଶାରେ ମଧ୍ୟ ଫଳାଫଳ ସନ୍ତୋଷଜନକ ରହିଛି। ରାଜ୍ୟର ପାସ୍ହାର ୯୩.୬୬% ଥିବା ବେଳେ ଛାତ୍ରୀମାନେ ୯୪.୮୩% ସହ ଅଗ୍ରସର ରହିଛନ୍ତି। ସରକାରୀ ବିଦ୍ୟାଳୟମାନଙ୍କର ପାସ୍ହାର ୯୪.୨୪% ରହିଥିବାବେଳେ ବେସରକାରୀ ବିଦ୍ୟାଳୟରେ ୯୨.୩୮% ରହିଛି।
ଏହିବର୍ଷ ତିରୁଅନନ୍ତପୁରମ୍ ଓ ବିଜୟୱାଡା ଜୋନ୍ ସର୍ବାଧିକ ପାସ୍ହାର ୯୯.୭୯% ସହ ଶୀର୍ଷରେ ରହିଛି। ଭୁବନେଶ୍ୱର ଜୋନ୍ ମଧ୍ୟ ୯୪.୬୭% ପାସ୍ହାର ସହ ଉଲ୍ଲେଖନୀୟ ପ୍ରଦର୍ଶନ କରିଛି।
ବିଶେଷ କଥା ହେଉଛି, ଜବାହର ନବୋଦୟ ବିଦ୍ୟାଳୟ ଓ କେନ୍ଦ୍ରୀୟ ବିଦ୍ୟାଳୟମାନେ ପୁନର୍ବାର ଶ୍ରେଷ୍ଠ ଫଳାଫଳ ଦେଖାଇଛନ୍ତି, ଯାହାର ପାସ୍ହାର ପ୍ରାୟ ୯୯% ଉପରେ ରହିଛି।
ଟିନା ରଥଙ୍କ ଏହି ଅଦ୍ୱିତୀୟ ସଫଳତା କେବଳ ଓଡ଼ିଶା ପାଇଁ ନୁହେଁ, ସାରା ଦେଶ ପାଇଁ ଗର୍ବର ବିଷୟ। ତାଙ୍କର ପରିଶ୍ରମ, ନିଷ୍ଠା ଓ ଲକ୍ଷ୍ୟପ୍ରତି ଅଟୁଟ ଧ୍ୟାନ ଅନ୍ୟ ଛାତ୍ରଛାତ୍ରୀଙ୍କ ପାଇଁ ପ୍ରେରଣା ହୋଇରହିଛି ।
ଚର୍ଚ୍ଚା news
