ମୋରମ ଲୁଟ୍ରେ କୋଟି କୋଟି ରାଜସ୍ୱ ହାନି ଅଭିଯୋଗ ::
BY- subhasmita DT-11.8.2026
ଗଞ୍ଜାମର ପାହାଡ଼ ଏବେ ମାଫିଆଙ୍କ ଟାର୍ଗେଟ୍ରେ। ଦିନ ହେଉ କି ରାତି, ଜେସିବି ଓ ହାଇୱା ଲଗାଇ ପାହାଡ଼ରୁ ମୋରମ ଉଠାଯାଉଥିବା ଅଭିଯୋଗ ଆସୁଛି। ଏହାର ପ୍ରଭାବରେ ଗୋଟିଏ ପଟେ ପ୍ରାକୃତିକ ସମ୍ପଦ ନଷ୍ଟ ହେଉଥିବାବେଳେ, ଅନ୍ୟପଟେ ସରକାରଙ୍କ ରାଜସ୍ୱ ମଧ୍ୟ କ୍ଷତିଗ୍ରସ୍ତ ହେଉଥିବା ଅଭିଯୋଗ ହୋଇଛି।
ଖଲ୍ଲିକୋଟ ଓ ଗଞ୍ଜାମ ତହସିଲର ବିଭିନ୍ନ ଅଞ୍ଚଳରେ ମୋରମ ଉତ୍ତୋଳନକୁ ନେଇ ସ୍ଥାନୀୟ ଲୋକେ ପ୍ରଶ୍ନ ଉଠାଇଛନ୍ତି। ଶ୍ୟାମସୁନ୍ଦରପୁର, ବାଘୁଆ, ଝୋଳାମାଳ, ସାନଘାଟି, ବାଦପଲ୍ଲୀ, କୋମଣ୍ଡ ଏବଂ ଶତ୍ରୁସୋଲ ଅଞ୍ଚଳର ପାହାଡ଼ଗୁଡ଼ିକରେ ବେଆଇନ ଖନନ ହେଉଥିବା ନେଇ ଅଭିଯୋଗ ରହିଛି ।
ସ୍ଥାନୀୟଙ୍କ କହିବା ଅନୁସାରେ, ଖନନ ପାଇଁ ବଡ଼ ବଡ଼ ମେସିନ ବ୍ୟବହାର କରାଯାଉଛି। ପାହାଡ଼ କାଟି ମୋରମ ବାହାର କରାଯିବା ପରେ ହାଇୱା ଓ ଅନ୍ୟ ଭାରୀ ଯାନରେ ଏହାକୁ ବାହାରକୁ ପଠାଯାଉଛି। ଯଦି ଏହି ଅଭିଯୋଗ ସତ, ତେବେ ଏତେ ବଡ଼ ପରିମାଣର ଖଣିଜ ପରିବହନ ପ୍ରଶାସନର ନଜରକୁ ନଆସିବା ନେଇ ମଧ୍ୟ ପ୍ରଶ୍ନ ଉଠୁଛି।
ଆହୁରି ଏକ ଗୁରୁତର ଅଭିଯୋଗ ହେଉଛି, ଖଲ୍ଲିକୋଟ ଅଞ୍ଚଳରୁ ବାହାରୁଥିବା ମୋରମ ଟ୍ରକ୍ଗୁଡ଼ିକ ଜାତୀୟ ରାଜପଥ-୧୬ ଦେଇ ବାଲୁଗାଁ ଆଡ଼କୁ ଯାଉଛି। ରାସ୍ତାରେ ଚେକିଂ ବ୍ୟବସ୍ଥା ଥିବା ସତ୍ତ୍ୱେ ଏତେ ପରିମାଣର ଖଣିଜ କିପରି ଯାଉଛି ତାହା ତଦନ୍ତର ବିଷୟ।
ବେଆଇନ ଖନନ ଯଦି ଜାରି ରହେ, ତାହାର ପ୍ରଭାବ କେବଳ ରାଜସ୍ୱ ହାନିରେ ସୀମିତ ରହିବ ନାହିଁ। ପାହାଡ଼ର ପ୍ରାକୃତିକ ଗଠନ ନଷ୍ଟ ହେବା ସହ ଜଙ୍ଗଲ, ଜଳସ୍ରୋତ ଓ ସ୍ଥାନୀୟ ପରିବେଶ ଉପରେ ମଧ୍ୟ ଏହାର ଦୀର୍ଘମିଆଦି ପ୍ରଭାବ ପଡ଼ିପାରେ।
ଲୋକଙ୍କ ଅଭିଯୋଗ ପରେ ଯଦି ଚଢ଼ାଉ ହେଉଛି, ତେବେ କେତେ ଗାଡ଼ି ଜବତ ହେଲା, କେତେ ଜରିମାନା ଆଦାୟ ହେଲା ଏବଂ କେତେ ମାମଲା ରୁଜୁ ହେଲା ତାହାର ସ୍ପଷ୍ଟ ହିସାବ ସାମ୍ନାକୁ ଆସିବା ଦରକାର। କେବଳ ଚଢ଼ାଉ ନୁହେଁ, ଖନନର ମୂଳ ଉତ୍ସ ଓ ଏହା ପଛରେ ଥିବା ଲୋକଙ୍କ ପର୍ଯ୍ୟନ୍ତ ତଦନ୍ତ ପହଞ୍ଚିବା ଆବଶ୍ୟକ।
ଏବେ ବଡ଼ ପ୍ରଶ୍ନ ଗଞ୍ଜାମରେ ଯଦି ଏଭଳି ଭାବେ ପାହାଡ଼ କଟାଯାଉଥିବା ଅଭିଯୋଗ ରହିଛି, ତେବେ ଏହା ଉପରେ ପ୍ରଶାସନ କେବେ କଠୋର ପଦକ୍ଷେପ ନେବ?
ପାହାଡ଼ ବଞ୍ଚିଲେ ପରିବେଶ ବଞ୍ଚିବ,
ପରିବେଶ ବଞ୍ଚିଲେ ଲୋକଙ୍କ ଭବିଷ୍ୟତ ବଞ୍ଚିବ।
ଅଭିଯୋଗର ସତ୍ୟତା ଯାଞ୍ଚ କରି ଦୋଷୀଙ୍କ ବିରୋଧରେ ଦୃଢ଼ ଆଇନଗତ ପଦକ୍ଷେପ ନେବା ସହ ରାଜସ୍ୱ କ୍ଷତିର ମଧ୍ୟ ହିସାବ ସାର୍ବଜନୀନ କରିବାକୁ ଦାବି ହେଉଛି ।
ଚର୍ଚ୍ଚା tv
