BY-SUBHASMITA-15.4.2026
ଭୁବନେଶ୍ବର ::କେନ୍ଦ୍ର ସରକାର ଦେଶର ନିର୍ବାଚନ ବ୍ୟବସ୍ଥାରେ ବଡ଼ ପରିବର୍ତ୍ତନ ଆଣିବା ପ୍ରସ୍ତାବ ରଖିଛନ୍ତି। ଏହି ପ୍ରସ୍ତାବ ଅନୁସାରେ ଲୋକସଭା ଓ ସମସ୍ତ ରାଜ୍ୟର ବିଧାନସଭା ଆସନ ସଂଖ୍ୟା ୫୦% ପର୍ଯ୍ୟନ୍ତ ବଢ଼ାଯିବ। ଏଥିପାଇଁ ଡିଲିମିଟେସନ୍ ବିଲ୍, ୨୦୨୬ ସଂସଦର ସ୍ୱତନ୍ତ୍ର ଅଧିବେଶନରେ ଆଣାଯିବାକୁ ଯାଉଛି।
ଏହି ଯୋଜନା ଲାଗୁ ହେଲେ ଦେଶର ଲୋକସଭା ଆସନ ୫୪୩ରୁ ବଢ଼ି ପ୍ରାୟ ୮୫୦ ପର୍ଯ୍ୟନ୍ତ ପହଞ୍ଚିବାର ସମ୍ଭାବନା ରହିଛି। ଏହାର ସିଧା ପ୍ରଭାବ ରାଜ୍ୟଗୁଡ଼ିକ ଉପରେ ପଡ଼ିବ।
ଓଡ଼ିଶାରେ ଏବେ ଥିବା ୨୧ ଲୋକସଭା ଆସନ ବଢ଼ି ୩୧ କିମ୍ବା ୩୨ ପର୍ଯ୍ୟନ୍ତ ହୋଇପାରେ ବୋଲି ଅନୁମାନ କରାଯାଉଛି। ସେହିପରି ବିଧାନସଭା ଆସନ ସଂଖ୍ୟା ମଧ୍ୟ ବହୁତ ବୃଦ୍ଧି ପାଇ ୭୩–୭୪ ଆସନ ଅଧିକ ହୋଇ ମୋଟ ୨୨୦–୨୨୧ ପର୍ଯ୍ୟନ୍ତ ପହଞ୍ଚିପାରେ।
ଏହି ପରିବର୍ତ୍ତନ ସହିତ ଡିଲିମିଟେସନ୍ ସୀମା ପୁନଃନିର୍ଦ୍ଧାରଣ ପ୍ରକ୍ରିୟା ମଧ୍ୟ ଆରମ୍ଭ ହେବ। ଏହାର ଫଳରେ ପୁରୁଣା ନିର୍ବାଚନ ଆସନଗୁଡ଼ିକ ଭାଗ ହୋଇ ନୂଆ ଆସନ ଗଠନ ହେବ। ଭୁବନେଶ୍ୱର, କଟକ, କେବିକେ ଅଞ୍ଚଳ ଭଳି ଘନବସତି ଓ ଭୌଗୋଳିକ ଭାବେ ବଡ଼ ଅଞ୍ଚଳରେ ଅଧିକ ଆସନ ସୃଷ୍ଟି ହେବାର ସମ୍ଭାବନା ରହିଛି। ଆସିକା, ମୟୂରଭଞ୍ଜ ଓ ସୁନ୍ଦରଗଡ଼ ଭଳି କେତେକ ଲୋକସଭା ଆସନକୁ ଭାଙ୍ଗି ନୂଆ ଆସନ ତିଆରି ହୋଇପାରେ।
ସେହିପରି ଲୋକସଭା ଆସନ ପୁନଃଗଠନ ପରେ ତାହା ଆଧାରରେ ବିଧାନସଭା ଆସନ ସୀମା ମଧ୍ୟ ପୁନଃନିର୍ଦ୍ଧାରଣ ହେବ। ଏଥିରେ କେତେକ ନିର୍ବାଚନମଣ୍ଡଳୀ ଭାଗ ହୋଇପାରେ ଏବଂ କେତେକ ନୂଆ ଆସନ ଯୋଗ ହେବ।
ଏହା ସହିତ ନାରୀ ଶକ୍ତି ବନ୍ଦନ ଅଧିନିୟମ ମାଧ୍ୟମରେ ଲୋକସଭା ଓ ବିଧାନସଭାରେ ୩୩% ମହିଳା ସଂରକ୍ଷଣ ଲାଗୁ ହେବାର ପ୍ରସ୍ତାବ ମଧ୍ୟ ରହିଛି। ଏହା ରାଜନୈତିକ ଦଳଗୁଡ଼ିକର ପ୍ରାର୍ଥୀ ଚୟନ ଓ ନିର୍ବାଚନୀ ରଣନୀତିକୁ ବହୁତ ପ୍ରଭାବିତ କରିବ।
ଏହି ସମ୍ଭାବ୍ୟ ପରିବର୍ତ୍ତନ ୨୦୨୯ ସାଧାରଣ ନିର୍ବାଚନକୁ ଧ୍ୟାନରେ ରଖି ଆସୁଥିବାରୁ ସମସ୍ତ ରାଜନୈତିକ ଦଳ ମଧ୍ୟରେ ଚର୍ଚ୍ଚା ଓ ଉତ୍ସାହ ଦୁହିଁ ଦେଖାଦେଇଛି। କିନ୍ତୁ ସୀମା ପୁନଃନିର୍ଦ୍ଧାରଣ ଓ ଆସନ ବୃଦ୍ଧି ଯେଉଁ ରାଜ୍ୟ ଓ ଅଞ୍ଚଳକୁ ଅଧିକ ଲାଭ ଦେବ, ସେଠାରେ ରାଜନୈତିକ ପ୍ରତିସ୍ପର୍ଧା ମଧ୍ୟ ଅଧିକ ତୀବ୍ର ହେବାର ଆଶଙ୍କା ରହିଛି ।
ଚର୍ଚ୍ଚା news
