ପଶ୍ଚିମବଙ୍ଗରେ ମମତା ବାନାର୍ଜୀଙ୍କ ଗାଡ଼ି ଉପରେ ହୋଇଥିବା ଆକ୍ରମଣକୁ ନେଇ ରାଜନୀତି ତୀବ୍ର ହୋଇଛି । ଏହି ଘଟଣାକୁ ନେଇ ଶିବସେନା (ଉଦ୍ଧବ ବାଲାସାହେବ ଠାକରେ) ବା ଶିବସେନା UBT କେନ୍ଦ୍ର ସରକାରଙ୍କୁ କଡ଼ା ସମାଲୋଚନା କରିଛି ।
ପଶ୍ଚିମବଙ୍ଗରେ ମମତା ବାନାର୍ଜୀଙ୍କ ଗାଡ଼ି ଉପରେ ହୋଇଥିବା ଆକ୍ରମଣକୁ ନେଇ ରାଜନୀତି ତୀବ୍ର ହୋଇଛି । ଏହି ଘଟଣାକୁ ନେଇ ଶିବସେନା (ଉଦ୍ଧବ ବାଲାସାହେବ ଠାକରେ) ବା ଶିବସେନା UBT କେନ୍ଦ୍ର ସରକାରଙ୍କୁ କଡ଼ା ସମାଲୋଚନା କରିଛି । ଦଳର ମୁଖପତ୍ର ‘ସାମନା’ର ସମ୍ପାଦକୀୟରେ ଏହି ଆକ୍ରମଣକୁ କେବଳ ଜଣେ ରାଜନୈତିକ ନେତାଙ୍କ ଉପରେ ଆକ୍ରମଣ ନୁହେଁ, ବରଂ ଗଣତନ୍ତ୍ର ଉପରେ ଆଘାତ ବୋଲି କୁହାଯାଇଛି ।
ଶିବସେନା UBTର ଅଭିଯୋଗ ଅନୁସାରେ, ପଥର, ଲାଠି ଓ ଲୁହା ରଡ୍ ଧରିଥିବା ଏକ ଭିଡ଼ ମମତାଙ୍କ ଗାଡ଼ିକୁ ଘେରିଥିଲା । ଦଳ କହିଛି, ଏଭଳି ହିଂସା ଜଣେ ଶକ୍ତିଶାଳୀ ବିରୋଧୀ ସ୍ୱରକୁ ଦମନ କରିବାର ପ୍ରୟାସ ଏବଂ ଏହା ଗଣତାନ୍ତ୍ରିକ ବ୍ୟବସ୍ଥା ପାଇଁ ଚିନ୍ତାଜନକ । ଏହି ଘଟଣାକୁ ନେଇ ତୃଣମୂଳ କଂଗ୍ରେସ ମଧ୍ୟ ଆକ୍ରମଣ ପାଇଁ ବିଜେପିକୁ ଦାୟୀ କରି ଅଭିଯୋଗ କରିଛି । ଅନ୍ୟପଟେ ବିଜେପି ଏହି ଅଭିଯୋଗକୁ ଖଣ୍ଡନ କରିବା ସହ ମମତାଙ୍କ ଉପରେ ହୋଇଥିବା ଆକ୍ରମଣକୁ ନିନ୍ଦା କରିଛି ।
ଶିବସେନା UBT ଆହୁରି ଅଭିଯୋଗ କରିଛି ଯେ, ପଶ୍ଚିମବଙ୍ଗରେ ରାଜନୈତିକ ହିଂସା ବଢ଼ୁଥିବା ସମୟରେ କେନ୍ଦ୍ର ସରକାରଙ୍କ ପ୍ରତିକ୍ରିୟା ପ୍ରଶ୍ନ ଉଠାଉଛି । ନିର୍ବାଚନ ସମୟରେ ଆଇନଶୃଙ୍ଖଳା ପାଇଁ କେନ୍ଦ୍ରୀୟ ବାହିନୀ ମୁତୟନ କରାଯାଇଥିବା ବେଳେ ବର୍ତ୍ତମାନ ହିଂସା ଘଟଣାରେ ସମାନ ତତ୍ପରତା କାହିଁକି ଦେଖାଯାଉନାହିଁ ବୋଲି ଦଳ ପ୍ରଶ୍ନ କରିଛି । ଦଳର ମତରେ, ଗଣତନ୍ତ୍ରରେ ରାଜନୈତିକ ବିରୋଧର ଉତ୍ତର ହିଂସା ନୁହେଁ । ନିର୍ବାଚନୀ ଲଢ଼େଇ ଭୋଟ୍ ବାକ୍ସରେ ହେବା ଉଚିତ ଏବଂ ବିରୋଧୀ ଦଳର ନେତାମାନଙ୍କ ସୁରକ୍ଷା ଓ ମତପ୍ରକାଶର ଅଧିକାରକୁ ସମ୍ମାନ କରାଯିବା ଦରକାର ବୋଲି ଶିବସେନା UBT କହିଛି । ତେବେ ମମତାଙ୍କ ଉପରେ ଆକ୍ରମଣକୁ ନେଇ ଟିଏମସି, ବିଜେପି ଓ ଶିବସେନା UBTର ଭିନ୍ନ ଭିନ୍ନ ଦାବି ରହିଛି। ତେଣୁ ଘଟଣାର ପ୍ରକୃତ କାରଣ ଓ ଦାୟୀ ବ୍ୟକ୍ତିଙ୍କ ସମ୍ପର୍କରେ ତଦନ୍ତର ନିଷ୍କର୍ଷ ଗୁରୁତ୍ୱପୂର୍ଣ୍ଣ ହେବ ।
ଚର୍ଚ୍ଚା tv
