ଉଦଳାରେ ଅଂଶୁଘାତରେ ଚାଲିଗଲା କୈଳାଶ ନାୟକଙ୍କ ଜୀବନ, ଶୋକରେ ଡୁବିଲା ବୃନ୍ଦାଗଡ଼ି ଗ୍ରାମଉଦଳା, (ରାଜୀବ କୁମାର ବେହେରା): ମୟୂରଭଞ୍ଜ ଜିଲ୍ଲାରେ ଦିନକୁ ଦିନ ବଢୁଥିବା ତାତି ଏବେ ସାଧାରଣ ଲୋକଙ୍କ ପାଇଁ ମୃତ୍ୟୁର କାରଣ ପାଲଟିଛି। ଅସହ୍ୟ ଗରମ ଓ ଗୁଳୁଗୁଳିରେ ଜନଜୀବନ ଅସ୍ତବ୍ୟସ୍ତ ହୋଇପଡ଼ିଥିବା ବେଳେ ଉଦଳା ଅଞ୍ଚଳରୁ ପୁଣି ଏକ ହୃଦୟବିଦାରକ ଘଟଣା ସାମ୍ନାକୁ ଆସିଛି। ଅଂଶୁଘାତ ନେଇଛି ଆଉ ଏକ ନିରୀହ ଜୀବନ।ମୃତକ ହେଲେ ଉଦଳା ଥାନା ଅଧୀନ ବୃନ୍ଦାଗଡ଼ି ଗ୍ରାମର କୈଳାଶ ନାୟକ। ସୂଚନା ଅନୁଯାୟୀ, କୈଳାଶ ନଦୀକୁ ଗାଧୋଇବା ପାଇଁ ଯାଇଥିବା ବେଳେ ହଠାତ୍ ଅସୁସ୍ଥ ହୋଇ ତଳେ ପଡ଼ିଯାଇଥିଲେ। ପରିବାର ଲୋକେ ତୁରନ୍ତ ତାଙ୍କୁ ଗୁରୁତର ଅବସ୍ଥାରେ ଉଦଳା ଡାକ୍ତରଖାନାକୁ ଆଣିଥିଲେ। ହେଲେ ସେଠାରେ କାର୍ଯ୍ୟରତ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ।ଘଟଣାର ଖବର ପାଇ ଉଦଳା ପୋଲିସ ଡାକ୍ତରଖାନାରେ ପହଞ୍ଚି ତଦନ୍ତ ଆରମ୍ଭ କରିଥିବା ବେଳେ ୨୭/୨୬ ରେ ଏକ ମାମଲା ରୁଜୁ କରିଛି ପାରମୁହୂର୍ତ୍ତ ରେ ଶୋକାକୁଳ ପରିବେଶ ମଧ୍ୟରେ ମୃତଦେହର ବ୍ୟବଛେଦ କରାଯାଇଥିଲା। ଏହି ଅକାଳ ମୃତ୍ୟୁ ପରେ ସମଗ୍ର ବୃନ୍ଦାଗଡ଼ି ଗ୍ରାମରେ ଶୋକର ଛାୟା ଖେଳିଯାଇଛି।ସ୍ଥାନୀୟ ଲୋକମାନେ କହିଛନ୍ତି, ଦିନକୁ ଦିନ ବଢୁଥିବା ତାପମାତ୍ରା ଓ ପ୍ରଚଣ୍ଡ ଖରା ଗରିବ ଓ ଶ୍ରମଜୀବୀ ଲୋକଙ୍କ ଜୀବନକୁ ସବୁଠାରୁ ଅଧିକ ପ୍ରଭାବିତ କରୁଛି। ମୃତକଙ୍କ ପରିବାରକୁ ତୁରନ୍ତ ସରକାରୀ ସହାୟତା ସହ ପରିବାରର ଜଣେ ସଦସ୍ୟଙ୍କୁ ଥଇଥାନ ବ୍ୟବସ୍ଥା କରିବାକୁ ଗ୍ରାମବାସୀମାନେ ଦାବି କରିଛନ୍ତି।