ଆମ୍ବୁଲାନ୍ସ ସହ ପିକଅପ୍ ମୁହାଁମୁହିଁ ଧକ୍କା, ୫ ଜଣ ଗୁରୁତର :
BY- ରାଜୀବ କୁମାର ବେହେରା
DT-2.4.2026 :: ମୟୁରଭଞ୍ଜ ଜଲ୍ଲାର ଉଦଳା ରୁ ବାରିପଦାକୁ ସଂଯୋଗ କରୁଥିବା ରାଜ୍ୟ ରାଜପଥ–୧୯ ଉଦଳା ଡୁକୁରା ନାଉପାଳ ନିକଟରେ ଆଜି ଏକ ହୃଦୟବିଦାରକ ସଡକ ଦୁର୍ଘଟଣା ଘଟିଛି। ନିଶାସକ୍ତ ଅବସ୍ଥାରେ ଥିବା ପିକଅପ୍ ଚାଳକଙ୍କ ବେପରୁଆ ଓ ଦ୍ରୁତ ଗାଡି ଚାଳନା ଫଳରେ ଏହି ଦୁର୍ଘଟଣା ଘଟିଥିବା ଅଭିଯୋଗ ହୋଇଛି।
ସୂଚନା ଅନୁସାରେ, ଜଣେ ଗୁରୁତର ରୋଗୀକୁ ନେଇ ବାରିପଦା ଯାଉଥିବା ୧୦୮ ଆମ୍ବୁଲାନ୍ସ ସହ ପିକଅପ୍ ଗାଡିର ମୁହାଁମୁହିଁ ଧକ୍କା ହୋଇଥିଲା। ଧକ୍କାର ତୀବ୍ରତା ଏତେ ଅଧିକ ଥିଲା ଯେ ଉଭୟ ଯାନ ପ୍ରାୟ ଚୁର୍ମାର ହୋଇଯାଇଥିଲା ଏବଂ ଘଟଣାସ୍ଥଳରେ ଭୟଙ୍କର ପରିସ୍ଥିତି ସୃଷ୍ଟି ହୋଇଥିଲା।
ଏହି ଦୁର୍ଘଟଣାରେ ଆମ୍ବୁଲାନ୍ସ ଡ୍ରାଇଭର SK Ahmed, ଫାର୍ମାସିଷ୍ଟ ଭବାନୀ ଶଙ୍କର ଜେନା, ରୋଗୀ ଓ ତାଙ୍କ ସମ୍ପର୍କୀୟ ସହିତ ମୋଟ ୫ ଜଣ ଗୁରୁତର ଆହତ ହୋଇଛନ୍ତି। ବିଶେଷକରି ରୋଗୀଙ୍କ ମୁଣ୍ଡରେ ଗଭୀର ଆଘାତ ଲାଗିଥିବାରୁ ସେ ଗୁରୁତର ଅବସ୍ଥାରେ ଥିବା ସୂଚନା ମିଳିଛି।
ଦୁର୍ଘଟଣା ପରେ ସ୍ଥାନୀୟ ଲୋକେ ତୁରନ୍ତ ଘଟଣାସ୍ଥଳକୁ ପହଞ୍ଚି ଆହତମାନଙ୍କୁ ଉଦ୍ଧାର କରିଥିଲେ ଏବଂ ପୋଲିସକୁ ସୂଚନା ଦେଇଥିଲେ। ପରେ ସମସ୍ତ ଆହତଙ୍କୁ ଗୁରୁତର ଅବସ୍ଥାରେ ବାରିପଦା ଚିକିତ୍ସାଳୟକୁ ପଠାଯାଇଛି।
ଘଟଣା ପରେ କିଛି ସମୟ ପାଇଁ ଏହି ମୁଖ୍ୟ ରାସ୍ତାରେ ଯାତାୟାତ ବାଧାପ୍ରାପ୍ତ ହୋଇଥିଲା ଏବଂ ଘଟଣାସ୍ଥଳରେ ଲୋକଙ୍କ ଭିଡ ଲାଗିଥିଲା। ପୋଲିସ ପକ୍ଷରୁ ଘଟଣାର ତଦନ୍ତ ଜାରି ରହିଛି।
ସଚେତନତା
ନିଶାସକ୍ତ ଅବସ୍ଥାରେ ଗାଡି ଚାଳନା କେବଳ ଆଇନ ଭଙ୍ଗ ନୁହେଁ, ଏହା ଜୀବନ ପାଇଁ ଘାତକ। ଏପରି ଅବହେଳା ଅନେକ ନିର୍ଦୋଷ ଲୋକଙ୍କ ଜୀବନକୁ ବିପଦରେ ପକାଇଦେଉଛି। ସ୍ଥାନୀୟ ଲୋକମାନେ ଏହି ରାସ୍ତାରେ କଡା ଚେକିଂ, ଗତି ନିୟନ୍ତ୍ରଣ ଓ ନିଶାସକ୍ତ ଚାଳକଙ୍କ ବିରୋଧରେ କଡା କାର୍ଯ୍ୟାନୁଷ୍ଠାନ ପାଇଁ ଦାବି କରିଛନ୍ତି।
ଚର୍ଚ୍ଚା news
