ଚର୍ଚ୍ଚା NEWSଯାହାଙ୍କ ହାତରେ ଦୁନିଆର ମଙ୍ଗ, ଏମାନେ ତାଙ୍କରି ନାବିକ । ବ୍ରହ୍ମାଣ୍ଡ ଈଶ୍ୱରଙ୍କ ଅନନ୍ୟ ସେବକ । ପଚାରିଲେ କହନ୍ତି, ସେ ତ ନାବ, ସେ ହିଁ ନାବିକ । ଆମେ ସିନା କାତ ଧରୁ, ସେ ହିଁ ବୋହି ନିଅନ୍ତି ତାଙ୍କରି ନାଆ । ମହାପ୍ରଭୁଙ୍କୁ ଜଳକ୍ରୀଡ଼ା କରାଉଥିବା ପ୍ରତିଟି ନାଉରିଆ ବା ଚାପ ଦଳାଇଙ୍କ ଏହା ଅନ୍ତରର କଥା ।

BY-SUBHASAMITA-28.4.2026

ପୁରୀ :ଗ୍ରୀଷ୍ମର ତୀବ୍ର ତାପରୁ ମହାପ୍ରଭୁଙ୍କୁ ଶୀତଳତା ଦେବା ପାଇଁ ନରେନ୍ଦ୍ର ପୁଷ୍କରିଣୀରେ ଦିବ୍ୟ ନୌକା ବିହାର ହେଉଛି, ଯେଉଁଠାରେ ମଦନମୋହନ, ଭୂଦେବୀ ଓ ଶ୍ରୀଦେବୀଙ୍କ ସହ ପଞ୍ଚୁପାଣ୍ଡବ ଜଳକ୍ରୀଡ଼ାରେ ମଗ୍ନ।ଏହି ଅଲୌକିକ ଯାତ୍ରାର ଅଭିନ୍ନ ଅଂଶ ହେଉଛନ୍ତି ବ୍ରହ୍ମଗିରି ଅଞ୍ଚଳର ଚାପ ଦଳାଇ ସେବକମାନେ। ବର୍ଷ ସାରା ଚାଷ କାମରେ ବ୍ୟସ୍ତ ରହୁଥିବା ଏହି ସରଳ ଲୋକମାନେ, ଚନ୍ଦନ ଯାତ୍ରା ଆସିଲେ ହୃଦୟରୁ ସମର୍ପିତ ସେବକ ହୋଇଉଠନ୍ତି। ସେମାନଙ୍କ ମତରେ ସେ ହିଁ ନାବ, ସେ ହିଁ ନାବିକ; ଆମେ କେବଳ କାତ ଧରୁଛୁ।” ଏହି ଭକ୍ତିଭାବ ହିଁ ସେମାନଙ୍କ ସେବାକୁ ଅନନ୍ୟ କରିଥାଏ।ପ୍ରତିଦିନ ମହାପ୍ରଭୁଙ୍କ ଆଗମନ ପୂର୍ବରୁ ସେମାନେ ଶ୍ରଦ୍ଧାର ସହ ଚାପ (ନୌକା)କୁ ସଫା କରି ସଜାନ୍ତି। ନନ୍ଦା ଓ ଭଦ୍ରା ନାମକ ଦୁଇଟି ଚାପରେ ୮ ଜଣ ଚାପ ଦଳାଇ ନିୟୋଜିତ ଥାନ୍ତି, ଯେଉଁମାନେ ନୌକାର ଗତି ଓ ଦିଗ ନିୟନ୍ତ୍ରଣ କରି ମହାପ୍ରଭୁଙ୍କୁ ଜଳକ୍ରୀଡ଼ା କରାନ୍ତି। ଏହା ସହ ବୈଜୟନ୍ତୀ ନୌକାରେ ବାଦ୍ୟକାରମାନଙ୍କ ପାଇଁ ଜଣେ କୈବର୍ତ୍ତ ସେବକ ରହନ୍ତି।ସଞ୍ଜ ହେଲେ ନରେନ୍ଦ୍ର ପୁଷ୍କରିଣୀ ଘଣ୍ଟ-ଘଣ୍ଟା ଓ “ହରିବୋଲ” ଧ୍ୱନିରେ ଗୁଞ୍ଜିଉଠେ, ଯାହା ଭକ୍ତମାନଙ୍କ ମନକୁ ଭକ୍ତିରେ ଭରିଦିଏ। ଅକ୍ଷୟ ତୃତୀୟାରୁ ଆରମ୍ଭ ହୋଇଥିବା ଏହି ବାହାର ଚନ୍ଦନ ଯାତ୍ରା ବର୍ତ୍ତମାନ ଅଷ୍ଟମ ଦିନରେ ପହଞ୍ଚିଛି।

ଚର୍ଚ୍ଚା NEWS