ଆସନ୍ତା ମାସରେ କେନ୍ଦ୍ର ମନ୍ତ୍ରିମଣ୍ଡଳରେ ବଡ଼ଧରଣର ଅଦଳବଦଳ ହେବାର ସମ୍ଭାବନା ରହିଛି । ଜୁନ୍ ୧୫ ରୁ ୧୮ ମଧ୍ୟରେ କେନ୍ଦ୍ର ମନ୍ତ୍ରିମଣ୍ଡଳରେ ସମ୍ପ୍ରସାରଣ ହୋଇପାରେ ବୋଲି ସୂତ୍ରରୁ ଜଣାପଡ଼ିଛି ।
ଆସନ୍ତା ମାସରେ କେନ୍ଦ୍ର ମନ୍ତ୍ରିମଣ୍ଡଳରେ ବଡ଼ଧରଣର ଅଦଳବଦଳ ହେବାର ସମ୍ଭାବନା ରହିଛି। ଜୁନ୍ ୧୫ ରୁ ୧୮ ମଧ୍ୟରେ କେନ୍ଦ୍ର ମନ୍ତ୍ରିମଣ୍ଡଳରେ ସମ୍ପ୍ରସାରଣ ହୋଇପାରେ ବୋଲି ସୂତ୍ରରୁ ଜଣାପଡ଼ିଛି। ୨୦୨୭ରେ କେତେକ ରାଜ୍ୟରେ ବିଧାନସଭା ନିର୍ବାଚନ ହେବାକୁ ଥିବାବେଳେ ଏହାପୂର୍ବରୁ ରାଜନୈତିକ ଓ ସାଂଗଠନିକ ପୁନର୍ଗଠନ ପାଇଁ ବିଜେପି ନେତୃତ୍ୱ ପ୍ରସ୍ତୁତ ହେଉଥିବାରୁ ଅନେକ ରାଷ୍ଟ୍ରମନ୍ତ୍ରୀଙ୍କ ସମେତ ୧୨ରୁ ଅଧିକ ମନ୍ତ୍ରୀଙ୍କୁ ମନ୍ତ୍ରିମଣ୍ଡଳରୁ ବାଦ ଦିଆଯାଇପାରେ କିମ୍ବା ବିଭାଗ ଅଦଳବଦଳ କରାଯାଇପାରେ ବୋଲି ସୂଚନା ମିଳିଛି।
ଦଳୀୟ ସୂତ୍ର ଅନୁଯାୟୀ, ଅତି କମ୍ରେ ଦୁଇଜଣ କ୍ୟାବିନେଟ ମନ୍ତ୍ରୀ ଓ ତିନି ଜଣ ରାଷ୍ଟ୍ରମନ୍ତ୍ରୀ ମନ୍ତ୍ରିମଣ୍ଡଳରୁ ବାଦ୍ ପଡ଼ିବାର ସମ୍ଭାବନା ରହିଛି। ଆଗାମୀ କିଛି ଦିନ ମଧ୍ୟରେ ଜଣେ ବରିଷ୍ଠ କ୍ୟାବିନେଟ ମନ୍ତ୍ରୀଙ୍କୁ ରାଜନୈତିକ ଦୃଷ୍ଟିରୁ ଗୁରୁତ୍ୱପୂର୍ଣ୍ଣ ଦକ୍ଷିଣ ଭାରତୀୟ ରାଜ୍ୟରେ ବିଜେପିର ଦାୟିତ୍ୱ ଦିଆଯିବାର ସମ୍ଭାବନା ରହିଛି।
ଏହି ଅଦଳବଦଳରେ ୧୦-୧୨ଟି ମନ୍ତ୍ରଣାଳୟର ନେତୃତ୍ୱ ପରିବର୍ତ୍ତନ ହେବାର ମଧ୍ୟ ସମ୍ଭାବନା ରହିଛି, ଅନେକ ମନ୍ତ୍ରୀଙ୍କୁ ବିଭିନ୍ନ ବିଭାଗରେ ପୁନଃନିଯୁକ୍ତି ଦିଆଯିବ। ଅନ୍ୟପକ୍ଷରେ ଏନ୍ଡିଏରେ ବିଜେପିର ସହଯୋଗୀ ଦଳ ଜେଡି(ୟୁ), ଟିଡିପି, ଏନ୍ସିପି ଓ ଆର୍ଏଲ୍ଏମ୍ କ୍ୟାବିନେଟ୍ ସମ୍ପ୍ରସାରଣରେ ଲାଭାନ୍ବିତ ହେବାକୁ ଯାଉଛନ୍ତି। ସହଯୋଗୀ ଦଳମାନଙ୍କୁ ରାଷ୍ଟ୍ରମନ୍ତ୍ରୀ ପଦବୀ ମିଳିବାକୁ ଯାଉଥିବାବେଳେ ଜଣେ କିମ୍ବା ଦୁଇଜଣଙ୍କୁ କ୍ୟାବିନେଟ ମନ୍ତ୍ରିପଦ ମିଳିପାରେ। ବରିଷ୍ଠ ବିଜେପି ନେତାମାନେ କହିଛନ୍ତି ଯେ, ଆଞ୍ଚଳିକ ଓ ସାମାଜିକ ପ୍ରତିନିଧିତ୍ୱକୁ ଧ୍ୟାନରେ ରଖି ଏହି ପୁନର୍ଗଠନର ଯୋଜନା କରାଯାଉଛି, ବିଶେଷକରି ଉତ୍ତର ପ୍ରଦେଶ ଓ ପଞ୍ଜାବ ଭଳି ରାଜ୍ୟରେ ଆସନ୍ତାବର୍ଷ ନିର୍ବାଚନ ହେବାକୁ ଥିବାରୁ ଏହାକୁ ଦୃଷ୍ଟିରେ ରଖି ଏହି ପଦକ୍ଷେପ ନିଆଯାଉଛି।
ଅନ୍ୟପକ୍ଷରେ ବିଜେପି କେତେକ ରାଜ୍ୟରେ ଦଳର ନୂଆ ସଭାପତି ନିଯୁକ୍ତି ଦେଇ ସାଂଗଠନିକ ପରିବର୍ତ୍ତନ ଆରମ୍ଭ କରିସାରିଛି । କେନ୍ଦ୍ର ଅର୍ଥ ରାଷ୍ଟ୍ରମନ୍ତ୍ରୀ ପଙ୍କଜ ଚୌଧୁରୀଙ୍କୁ ଉତ୍ତର ପ୍ରଦେଶ ପାଇଁ ବିଜେପି ମୁଖ୍ୟ ନିଯୁକ୍ତ କରାଯାଇଥିବାବେଳେ କର୍ପୋରେଟ୍ ବ୍ୟାପାର ଓ ସଡ଼କ ପରିବହନ ଓ ରାଜପଥ ରାଷ୍ଟ୍ରମନ୍ତ୍ରୀ ହର୍ଷ ମଲହୋତ୍ରାଙ୍କୁ ଦିଲ୍ଲୀ ବିଜେପି ସଭାପତି ଭାବେ ନିଯୁକ୍ତ କରାଯାଇଛି। ସେମାନଙ୍କ ସ୍ଥାନରେ ସଂସଦର ଦୁଇ ଗୃହରୁ ନୂଆ ମୁହଁଙ୍କୁ ମନ୍ତ୍ରିମଣ୍ଡଳରେ ସାମିଲ କରାଯିବ। କର୍ଣ୍ଣାଟକ ବିଜେପି ମୁଖ୍ୟ ଭାବରେ ଜଣେ କ୍ୟାବିନେଟ ମନ୍ତ୍ରୀଙ୍କୁ ଦାୟିତ୍ବ ଦେବାର ସମ୍ଭାବନା ମଧ୍ୟ ରହିଛି ଓ ମଣିପୁର ବିଜେପି ପାଇଁ ନୂତନ ସଭାପତି ଘୋଷଣା କରିବାକୁ ପ୍ରସ୍ତୁତ ହେଉଛି।
ସୂତ୍ର ଅନୁସାରେ ବିଜେପି ରାଜ୍ୟସଭା ମାଧ୍ୟମରେ କେନ୍ଦ୍ର କ୍ୟାବିନେଟରେ ମଣିପୁର ପାଇଁ ପ୍ରତିନିଧିତ୍ୱକୁ ସହଜ କରିପାରେ। ଚଳିତ ବର୍ଷ ଶେଷ କିମ୍ବା ୨୦୨୭ ପ୍ରାରମ୍ଭରେ ରାଜ୍ୟସଭାର କାର୍ଯ୍ୟକାଳ ଶେଷ ହେଉଥିବା ଅନେକ ମନ୍ତ୍ରୀଙ୍କୁ ସଂଗଠନାତ୍ମକ ଭୂମିକାକୁ ସ୍ଥାନାନ୍ତରିତ କରାଯାଇପାରେ। ସୂତ୍ର ଅନୁସାରେ ସଂଗଠନ ଅଭିଜ୍ଞତା ଓ ବରିଷ୍ଠତା ଆଧାରରେ କେତେକ ବିଜେପି ମୋର୍ଚ୍ଚା ନେତାଙ୍କୁ ପ୍ରଥମ ଥର ପାଇଁ ମନ୍ତ୍ରିମଣ୍ଡଳରେ ସାମିଲ କରାଯାଇପାରେ।
ବିହାରର ଜଣେ କ୍ୟାବିନେଟ୍ ମନ୍ତ୍ରୀଙ୍କ ସ୍ଥାନରେ ସମାନ ଜାତି ଗୋଷ୍ଠୀର ଅନ୍ୟ ଜଣେ ସାଂସଦଙ୍କୁ ନିଆଯାଇପାରେ ବୋଲି ଚର୍ଚ୍ଚା ହେଉଛି।
ରେଳ, ଅର୍ଥ, କର୍ପୋରେଟ୍ ବ୍ୟାପାର, କୋଇଲା, ବୟନଶିଳ୍ପ, ସୂଚନା ଓ ପ୍ରସାରଣ, ଇଲେକ୍ଟ୍ରୋନିକ୍ସ ଓ ସୂଚନା ପ୍ରଯୁକ୍ତିବିଦ୍ୟା, ଗ୍ରାମୀଣ ବିକାଶ, ରସାୟନ ଓ ସାର, ସହଯୋଗ, ମତ୍ସ୍ୟପାଳନ, ଜଳ ଶକ୍ତି, କୃଷି, ପରିବେଶ, ଆଇନ ମନ୍ତ୍ରଣାଳୟରେ ଅଦଳବଦଳ ହେବାର ସମ୍ଭାବନା ରହିଛି। କିଛି ମନ୍ତ୍ରଣାଳୟ ଅତିରିକ୍ତ ଦାୟିତ୍ୱ ନେବା ପରିବର୍ତ୍ତେ କ୍ୟାବିନେଟରେ ପୃଥକ ଭାବେ ମନ୍ତ୍ରୀ ପଦ ପାଇପାରନ୍ତି। ବିହାରର ସହଯୋଗୀ ଦଳଗୁଡ଼ିକୁ ମନ୍ତ୍ରିପଦ ଦେବା ନେଇ ମଧ୍ୟ ଦଳ ମଧ୍ୟରେ ଆଲୋଚନା ଚାଲିଛି। ଦଳୀୟ ସୂତ୍ରରୁ ଜଣାପଡିଛି ଯେ, ମାନବ ସମ୍ବଳ ବିକାଶ ଓ ବେସାମରିକ ବିମାନ ଚଳାଚଳ ମନ୍ତ୍ରଣାଳୟରେ ମନ୍ତ୍ରୀ ସ୍ତରରେ ରାଜ୍ୟରୁ ସହଯୋଗୀ ଦଳକୁ ପଦବୀ ଦିଆଯାଇପାରେ।
ଚର୍ଚ୍ଚା news
