ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କର୍ଣ୍ଣାଟକର ବେଙ୍ଗାଲୁରୁରେ ଦି ଆର୍ଟ ଅଫ୍ ଲିଭିଂ ଫାଉଣ୍ଡେସନର ୪୫ତମ ବାର୍ଷିକୀ ସମାରୋହରେ ଯୋଗ ଦେଇ ଏକ ସାଧାରଣ ସଭାକୁ ସମ୍ବୋଧିତ କରି କଂଗ୍ରେସ ଦଳକୁ କଡ଼ା ସମାଲୋଚନା କରିଛନ୍ତି।
ବେଙ୍ଗାଲୁରୁର ମଞ୍ଚରୁ କଂଗ୍ରେସ ଉପରେ ବର୍ଷିଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ। ଡିଏମ୍କେ ସହ ଦୀର୍ଘ ବର୍ଷର ସମ୍ପର୍କକୁ ଉଦାହରଣ ଦେଇ କହିଲେ ସୁଯୋଗ ମିଳିବାମାତ୍ରେ କଂଗ୍ରେସ ପିଠିରେ ଛୁରୀ ଭୁସିଦେଇଛି।”
ତାମିଲନାଡୁରୁ କର୍ଣ୍ଣାଟକ, କେରଳରୁ ରାଜସ୍ଥାନ ସବୁଠି କଂଗ୍ରେସ ନିଜ ନେତାଙ୍କ ସହ ବିଶ୍ୱାସଘାତ କରୁଥିବା ଅଭିଯୋଗ ଆଣିଲେ ମୋଦୀ। ସେ କହିଲେ, କଂଗ୍ରେସ କେବଳ କ୍ଷମତା ପାଇଁ ରାଜନୀତି କରୁଛି।
ସେହିସହିତ ଏନ୍ଡିଏର ନିର୍ବାଚନୀ ସଫଳତାକୁ ଉଲ୍ଲେଖ କରି ବିଜେପି କର୍ମୀଙ୍କୁ ଉତ୍ସାହିତ କରିଥିଲେ ପ୍ରଧାନମନ୍ତ୍ରୀ।ଡିଏମ୍କେ ସହିତ ମେଣ୍ଟ ବାରମ୍ବାର କଂଗ୍ରେସ ଦଳକୁ ସଙ୍କଟରୁ ରକ୍ଷା କରିଥିଲା। ୨୦୧୪ପୂର୍ବରୁ ଦଶ ବର୍ଷ ଧରି, ଡିଏମ୍କେର ସମର୍ଥନ ଯୋଗୁଁ କଂଗ୍ରେସ ନେତୃତ୍ୱାଧୀନ ସରକାର ମୁଖ୍ୟତଃ ବଞ୍ଚି ରହିଥିଲା। କଂଗ୍ରେସ ଦଳର ଉତ୍ଥାନ ପାଇଁ ନିରନ୍ତର କାର୍ଯ୍ୟ କରୁଥିବା ଡିଏମ୍କେ ପ୍ରତି ରାଜନୈତିକ ସ୍ଥିତି ପରିବର୍ତ୍ତନ ହେବା ମାତ୍ରେ କଂଗ୍ରେସ ବିଶ୍ୱାସଘାତକତା କରିଛି। କଂଗ୍ରେସ ଏକ ପରଜୀବୀ ଦଳ ଭାବରେ ପରିଚିତ ହୋଇଛି । କଂଗ୍ରେସ କ୍ଷମତା ଭୋକିଲା ପାଲଟିଛି।
ପ୍ରଧାନମନ୍ତ୍ରୀ ତାଙ୍କ ଭାଷଣରେ କହିଛନ୍ତି, ଜନସାଧାରଣଙ୍କ ସମସ୍ୟା ସମାଧାନ କରିବା ପରିବର୍ତ୍ତେ, କର୍ଣ୍ଣାଟକର ସରକାର ଆଭ୍ୟନ୍ତରୀଣ ବିବାଦ ସମାଧାନ କରିବାରେ ଅଧିକାଂଶ ସମୟ ବିତାଉଛନ୍ତି। ମୁଖ୍ୟମନ୍ତ୍ରୀ କେତେ ଦିନ ପାଇଁ ପଦବୀରେ ରହିବେ ତାହା ଏପର୍ଯ୍ୟନ୍ତ ସ୍ଥିର ହୋଇନାହିଁ। କେରଳରେ ମଧ୍ୟ କଂଗ୍ରେସ ଏପର୍ଯ୍ୟନ୍ତ କୌଣସି ନିଷ୍କର୍ଷରେ ପହଞ୍ଚି ପାରୁନାହିଁ। କଂଗ୍ରେସ ନିଜ ଦଳର ନେତାମାନଙ୍କୁ ପ୍ରତିଶ୍ରୁତି ଦେଉଛି ଏବଂ ପରେ ସେମାନଙ୍କ ପ୍ରତି ବିଶ୍ୱାସଘାତକତା କରୁଛି। ଛତିଶଗଡ଼ ଏବଂ ରାଜସ୍ଥାନରେ ମଧ୍ୟ ସମାନ ଘଟଣା ଘଟିଥିଲା। କର୍ଣ୍ଣାଟକରେ ମଧ୍ୟ ସମାନ ଖେଳ ଚାଲିଛି। ଏବେ କେରଳର ପାଳି। କଂଗ୍ରେସ ଦେଶର ସବୁଠାରୁ ମହିଳା ବିରୋଧୀ ଦଳ।
ସେଥିପାଇଁ କଂଗ୍ରେସ ସଂସଦରେ ନାରୀ ଶକ୍ତି ବନ୍ଦନ ସଂଶୋଧନକୁ ବିଫଳ କରିଥିଲା। ଯଦି ଏହି ସଂଶୋଧନ ଗୃହୀତ ହୋଇଥାନ୍ତା, ତେବେ କର୍ଣ୍ଣାଟକର ଲୋକସଭା ଆସନ ଯଥେଷ୍ଟ ବୃଦ୍ଧି ପାଇଥାନ୍ତା। କର୍ଣ୍ଣାଟକର ବହୁ ସଂଖ୍ୟକ ଭଉଣୀ ଏବଂ ଝିଅ ବିଧାୟକ ଏବଂ ସାଂସଦ ହୋଇଥାନ୍ତେ ତଥା ଦେଶର ଭବିଷ୍ୟତ ନିର୍ଣ୍ଣୟ କରିବାରେ ଅଂଶୀଦାର ହୋଇଥାନ୍ତେ। କିନ୍ତୁ କଂଗ୍ରେସ ଏହାକୁ ଘଟିବାରୁ ବାଧା ଦେଇଥିଲା। ଦେଶର ମହିଳା ଏବଂ କର୍ଣ୍ଣାଟକର ମହିଳାମାନେ ଏହି ପାପ ପାଇଁ କଂଗ୍ରେସକୁ କେବେ କ୍ଷମା କରିବେ ନାହିଁ।
ମୁଁ ଆଜି ବେଙ୍ଗାଲୁରୁରେ ପହଞ୍ଚିଛି ଯେତେବେଳେ ସାରା ଦେଶରେ ନିର୍ବାଚନ ଫଳାଫଳ ସମ୍ପର୍କରେ ଆଲୋଚନା ଚାଲିଛି। ପୁଡୁଚେରୀରେ ଲଗାତାର ଦ୍ୱିତୀୟ ଥର ପାଇଁ ଏନ୍ଡିଏ
ସରକାର ଗଠନ ହୋଇଛି, ଆସାମରେ ଲଗାତାର ତୃତୀୟ ଥର ପାଇଁ ଏନ୍ଡିଏ ସରକାର ଗଠନ ହୋଇଛି, ଏବଂ ବିଜେପି ପ୍ରଥମ ଥର ପାଇଁ ପଶ୍ଚିମବଙ୍ଗରେ ବିପୁଳ ଜନାଦେଶ ପାଇଛି। ଏହା ବ୍ୟତୀତ, ମାତ୍ର ଦୁଇ ସପ୍ତାହ ପୂର୍ବରୁ, ବିଜେପି ଗୁଜରାଟରେ ପଞ୍ଚାୟତ ଏବଂ ପୌର ସଂସ୍ଥା ନିର୍ବାଚନରେ ବିପୁଳ ବିଜୟ ହାସଲ କରି ପୂର୍ବ ସମସ୍ତ ରେକର୍ଡ ଭାଙ୍ଗି ଦେଇଛି। ପ୍ରଧାନମନ୍ତ୍ରୀ କହିଛନ୍ତି, ଆଜି ବେଙ୍ଗାଲୁରୁର ମାଟିରୁ ଏକ ଗେରୁଆ ସୂର୍ଯ୍ୟ ଉଦିତ ହୋଇଛି।
ଜଣେ ବିଜେପି କର୍ମୀ ଭାବରେ, ମୁଁ ବୁଝିପାରୁଛି, ହଜାର ହଜାର ବିଜେପି କର୍ମୀ ଏତେ ସକାଳୁ ଏକାଠି ହୋଇପାରନ୍ତି, ଏହାର ଅର୍ଥ କ’ଣ। ମୁଁ ଆପଣମାନଙ୍କ ସମସ୍ତଙ୍କ ପ୍ରତି କୃତଜ୍ଞ। ପଶ୍ଚିମବଙ୍ଗର ବିଜୟ ମଧ୍ୟ ଆପଣଙ୍କର ବିଜୟ। ଆଜି, ମେ ୧୦ ତାରିଖ, ଏକ ଐତିହାସିକ ତାରିଖ। ୧୮୫୭ ମସିହାରେ ଏହି ଦିନରେ ସ୍ୱାଧୀନତା ସଂଗ୍ରାମର ପ୍ରଥମ ସ୍ଫୁଲିଙ୍ଗ ପ୍ରଜ୍ଜ୍ୱଳିତ ହୋଇଥିଲା। ସମୟ ସହିତ, ଏହି ସ୍ଫୁଲିଙ୍ଗ ଏକ ବିଶାଳ ଅଗ୍ନିଶିଖାରେ ପରିଣତ ହୋଇଥିଲା ଯାହା ଦାସତ୍ୱର ଶିକୁଳିକୁ ଜାଳି ପାଉଁଶ କରିଦେଇଥିଲା। ସାହସ ଏବଂ ଶକ୍ତିର ଏହି ଐତିହ୍ୟ ଆମର ସର୍ବଶ୍ରେଷ୍ଠ ଶକ୍ତି |
ଚର୍ଚ୍ଚା news
