ମାଲକାନଗିରି ଜିଲ୍ଲାରେ ବଡ଼ ଆର୍ଥିକ ଅନିୟମିତତା ଘଟଣାକୁ ନେଇ ଭିଜିଲାନ୍ସ ବିଭାଗ ଦ୍ୱାରା କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। କୋରାପୁଟ ସେଣ୍ଟ୍ରାଲ କୋ-ଅପରେଟିଭ୍ ବ୍ୟାଙ୍କର ମାଲକାନଗିରି ଶାଖା ପ୍ରବନ୍ଧକ ସୁଧାଂଶୁ ଖୋରାଙ୍କୁ ସରକାରୀ ଧନର ବିପୁଳ ଆତ୍ମସାତ୍ ଅଭିଯୋଗରେ ଓଡ଼ିଶା ଭିଜିଲାନ୍ସ ଗିରଫ କରିଛି। ଅଭିଯୋଗ ଅନୁଯାୟୀ, ମାଲକାନଗିରି ଜିଲ୍ଲାର ୫ଟି ଲ୍ୟାମ୍ପସ୍ ଅଧୀନରେ ଥିବା ଚାଷୀମାନଙ୍କ ଦ୍ୱାରା ଜମା ହୋଇଥିବା ଫସଲ ଋଣ ରାଶିରୁ ପ୍ରାୟ ୧ କୋଟି ୮ ଲକ୍ଷ ୭୫ ହଜାର ଟଙ୍କା ଅନିୟମିତ ଭାବରେ ଆତ୍ମସାତ୍ କରାଯାଇଥିବା ଭିଜିଲାନ୍ସ ତଦନ୍ତରେ ପ୍ରକାଶ ପାଇଛି। ଏହି ଘଟଣାକୁ ନେଇ କୋରାପୁଟ ଭିଜିଲାନ୍ସ ଥାନାରେ ଦୁଇଟି ମାମଲା, ନମ୍ବର ୪ ଓ ୫, ତାରିଖ ୦୪.୦୫.୨୦୨୬ ରେ ରଜିଷ୍ଟର୍ କରାଯାଇଛି। ଏହି ମାମଲାଗୁଡିକୁ ପ୍ରିଭେନ୍ସନ୍ ଅଫ୍ କରପ୍ସନ୍ (ସଂଶୋଧନ) ଆଇନ ୨୦୧୮ ର ଧାରା ୧୩(୨) ସହିତ ୧୩(୧)(ଏ) ଓ ଭାରତୀୟ ନ୍ୟାୟ ସଂହିତା ୨୦୨୪ ର ଧାରା ୩୧୬(୫) ଓ ୩୪୪ ଅନୁଯାୟୀ ରଜିଷ୍ଟର୍ କରାଯାଇଛି। ଗିରଫ ପରେ ଅଭିଯୁକ୍ତ ସୁଧାଂଶୁ ଖୋରାଙ୍କୁ ଆଦାଲତରେ ପ୍ରସ୍ତୁତ କରାଯିବ ବୋଲି ଭିଜିଲାନ୍ସ ପକ୍ଷରୁ ସୂଚନା ମିଳିଛି, ଏବଂ ଏହି ଘଟଣା ଜିଲ୍ଲାରେ ବ୍ୟାଙ୍କିଂ ପ୍ରଣାଳୀ ପ୍ରତି ଗଭୀର ପ୍ରଶ୍ନ ଉଠାଇଛି ।
ଚର୍ଚ୍ଚା news
