ସାମ୍ବାଦିକ- ରାଜୀବ କୁମାର ବେହେରା
ତାରିଖ- ୨୦- ୦୫-୨୦୨୬
ମୟୁରଭଞ୍ଜ: ମୟୁରଭଞ୍ଜ ଜିଲ୍ଲାରେ ପୁଣି ଫାଇନାନ୍ସ କମ୍ପାନୀ କର୍ମଚାରୀଙ୍କ ଦାଦାଗିରି ଘଟଣା ସାମ୍ନାକୁ ଆସିଛି। ଋଣ ଆଦାୟ ନାଁରେ ସାଧାରଣ ଲୋକଙ୍କୁ ଧମକ, ଅସଦ୍ବ୍ୟବହାର ଓ ମାନସିକ ଚାପ ଦେବା ଭଳି ଅଭିଯୋଗ ଦିନକୁ ଦିନ ବଢ଼ିବାରେ ଲାଗିଛି। ଏବେ ରସିଦ ମାଗିବାକୁ କେନ୍ଦ୍ର କରି ଜଣେ ଯୁବକଙ୍କ ଉପରେ ମରଣାତ୍ମକ ଆକ୍ରମଣ ହୋଇଥିବା ଘଟଣା ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି।
ଏଭଳି ଘଟଣା ଖୁଣ୍ଟା ଥାନା ଅଧୀନ ନହରା ଅଞ୍ଚଳରେ ଘଟିଥିବା ଜଣାପଡ଼ିଛି। ସଞ୍ଜିବ ବେହେରା ଓ ତାଙ୍କ ଭାଇ ରଞ୍ଜିତ ବେହେରା ବାଇକରେ ଉଦଳା ବଜାର ଯାଉଥିବା ବେଳେ ହାଇସ୍କୁଲ ଛକ ନିକଟରେ କିଛି ଫାଇନାନ୍ସ କର୍ମଚାରୀ ସେମାନଙ୍କୁ ଅଟକାଇଥିଲେ। ବକେୟା ଥିବା ୭ଟି କିସ୍ତି ଟଙ୍କା ତୁରନ୍ତ ଦେବାକୁ କହିବା ସହ ସମସ୍ତ ଟଙ୍କା ଦେଇନପାରିବାରୁ ବାଇକକୁ ଛଡ଼ାଇ ନେଇଥିବା ଅଭିଯୋଗ ହୋଇଛି। ପରେ ସଞ୍ଜିବ ଓ ରଞ୍ଜିତଙ୍କୁ ଉଦଳା କଲେଜ ପଡ଼ିଆକୁ ଡାକି କଥାବାର୍ତ୍ତା ନାଁରେ ସମସ୍ତ ବକେୟା ଟଙ୍କା ତୁରନ୍ତ ଦେବାକୁ ଚାପ ପକାଯାଇଥିଲା। ଏହାକୁ ନେଇ ବଚସା ହେବା ପରେ କିଛି ଯୁବକ ମିଳିତ ଭାବେ ରଞ୍ଜିତଙ୍କୁ ବାଉଁଶ ବାଡ଼ିରେ ଆକ୍ରମଣ କରିଥିବା ସହ ଏକ ବିୟର ବୋତଲରେ ମୁଣ୍ଡକୁ ପ୍ରହାର କରି ଗୁରୁତର କରିଦେଇଥିବା ଅଭିଯୋଗ ହୋଇଛି। ଗୁରୁତର ଅବସ୍ଥାରେ ରଞ୍ଜିତଙ୍କୁ ପ୍ରଥମେ ଉଦଳା ଡାକ୍ତରଖାନା ଓ ପରେ ବାରିପଦା ମେଡିକାଲକୁ ସ୍ଥାନାନ୍ତର କରାଯାଇଛି। ଘଟଣାକୁ ନେଇ ପରିବାର ପକ୍ଷରୁ ଉଦଳା ଥାନାରେ ଲିଖିତ ଅଭିଯୋଗ ହୋଇଥିବା ବେଳେ ପୋଲିସ ତଦନ୍ତ ଜାରି ରଖିଛି। ଏହି ଘଟଣା ପରେ ଅଞ୍ଚଳରେ ଫାଇନାନ୍ସ କମ୍ପାନୀ କର୍ମଚାରୀଙ୍କ କାର୍ଯ୍ୟଶୈଳୀକୁ ନେଇ ଅସନ୍ତୋଷ ବୃଦ୍ଧି ପାଇଛି। ସାଧାରଣ ଲୋକଙ୍କ କହିବା ଅନୁସାରେ, ଋଣ ଆଦାୟ ପାଇଁ ଆଇନଗତ ପ୍ରକ୍ରିୟା ଥିବା ସତ୍ତ୍ୱେ କେତେକ କର୍ମଚାରୀ ଦାଦାଗିରି ଓ ଧମକ ଦେଇ ଟଙ୍କା ଆଦାୟ କରୁଥିବା ଅଭିଯୋଗ ହେଉଛି। ଏଭଳି ଘଟଣା ଉପରେ ପ୍ରଶାସନ ଓ ପୋଲିସ କଡ଼ା କାର୍ଯ୍ୟାନୁଷ୍ଠାନ ନେବାକୁ ସାଧାରଣରେ ଦାବି ଜୋର ଧରିଛି।
