ଉଦଳା -(ରାଜୀବ କୁମାର ବେହେରା ) – ଉଦଳା ପୋଲିସ ଦେଖିବାକୁ ମିଳିଛି ଆକ୍ସନ ମୋଡ୍ରେ। ବାଲି, ଗୋଡି,ପଥର ମାଫିଆଙ୍କ ଏବେ ବେଳା ଖରାପ ପଡିଛି l ବିଳମ୍ବିତ ରାତ୍ର ସମୟ ରେ ଦେବକୁଣ୍ଡ ଗେଟ ସାମ୍ନାଦେଇ ଖସି ପଳାଉଥିବା ଦୁଇଟି ଚୋରା ମୋରମ ବୋଝେଇ ଟ୍ରାକ୍ଟରକୁ ଜବଦ କରିଛି ଉଦଳା ପୋଲିସ। ତେବେ କପ୍ତିପଦା ଉପଖଣ୍ଡ ଉଦଳା ଅଞ୍ଚଳରେ ବିଭିନ୍ନ ସମୟରେ ଚୋରା ବାଲି, ମାଙ୍କଡା ଓ ବେଆଇନ ମୋରମ ଚାଲାଣ ହେଉଥିବା ନଜରକୁ ଆସୁଥିବା ବେଳେ ବିଶେଷ ସୂତ୍ରରୁ ଖବର ପାଇ ପୋଲିସ ଏହି କାର୍ଯ୍ୟାନୁଷ୍ଠାନ ନେଇ ଥିବା ଯାହା ସୂଚନା ରହିଛି।
ସୂଚନା ଅନୁସାରେ କୁଣ୍ଡାବାଇ ଅଞ୍ଚଳରେ ଚୋରା ମାଙ୍କଡା ଓ ମୋରମ ଚାଲାଣ ବୃଦ୍ଧି ପାଉଥିବାରୁ ସରକାରୀ ରାଜସ୍ୱ ହାନି ହେଉଥିବା ଦେଖାଯାଉଥିଲା। ଏନେଇ କୁଣ୍ଡାବାଇ ଫାଣ୍ଡି ଅଧିକାରୀ ଲିଟାରାମ ସରେନ ଉଦଳା ଥାନା ଭାରପ୍ରାପ୍ତ ଅଧିକାରୀ ବନମାଳୀ ବାରିକଙ୍କୁ ସୂଚନା ଦେଇଥିଲେ।
ଏହାପରେ ଉଦଳା ଥାନା ଅଧିକାରୀଙ୍କ ନିର୍ଦ୍ଦେଶରେ ପୋଲିସ ଟିମ୍ କୁଣ୍ଡାବାଇ ଅଞ୍ଚଳରେ କଡା ପେଟ୍ରୋଲିଙ୍ଗ କରୁଥିବା ବେଳେ ଉପର ତାଳଡିହା ଅଞ୍ଚଳରୁ ଦେବକୁଣ୍ଡ ମୁଖ୍ୟ ଫାଟକ ସାମ୍ନା ଦେଇ କୁଣ୍ଡାବାଇ ଅଭିମୁଖେ ଆସୁଥିବା ଦୁଇଟି ମୋରମ ବୋଝେଇ ଟ୍ରାକ୍ଟରକୁ ଅଟକାଇଥିଲା ପୋଲିସ।
ପୋଲିସକୁ ଦେଖି ଟ୍ରାକ୍ଟର ଚାଳକମାନେ ଗାଡି ଛାଡି ଘଟଣାସ୍ଥଳରୁ ଫେରାର ମାରିଥିବା ସୂଚନା ମିଳିଛି। OD-11AE-4511 ଓ OD-11C-4866 ନମ୍ବର ବିଶିଷ୍ଟ ଦୁଇଟି ଟ୍ରାକ୍ଟରକୁ ଜବଦ କରି ଉଦଳା ଥାନାକୁ ଆଣାଯାଇଛି ଓ ତଦନ୍ତ ଜାରି ରହିଛି।
ଉଦଳା ପୋଲିସର ଏହି ଅଚାନକ ଏକ୍ସନ ମୋଡ୍ ପରେ ଅଞ୍ଚଳରେ ଚୋରା ଖଣିଜ ବେପାରୀମାନଙ୍କ ମଧ୍ୟରେ କୋକୁଆ ଭୟ ସୃଷ୍ଟି ହୋଇଛି। ଶିମିଳିପାଳ ପାଦଦେଶରେ କିଛି ମାଫିଆ ଜଙ୍ଗଲ ଭିତରେ ଚୋରା ଖାଦାନ କରି ଲାଭ କମାଉଥିବା ଅଭିଯୋଗ ଥିବା ବେଳେ ଏଥିରେ ଜଙ୍ଗଲୀ ପ୍ରାଣୀ ଓ ପରିବେଶ ମଧ୍ୟ ବିପଦରେ ପଡ଼ୁଥିବା ନେଇ ପ୍ରଶ୍ନ ଉଠିଛି। ତେବେ ଏହିଭଳି ଅଚାନକ ଚଢ଼ାଉ ଆହୁରି ଆଗକୁ ବ୍ୟାପକ ହେବା ନେଇ ଥାନା ଅଧିକାରୀ ସୂଚନା ପ୍ରଦାନ କରିଛନ୍ତି l
