ଜାତିସଂଘରେ ପରମାଣୁ ଅପ୍ରସାର ଚୁକ୍ତି (NPT) ସମୀକ୍ଷା ସମ୍ମିଳନୀର ଉପାଧ୍ୟକ୍ଷ ଭାବେ ଇରାନକୁ ନିଯୁକ୍ତି ଦିଆଯାଇବା ପରେ ଆମେରିକା ଓ ଇରାନ ମଧ୍ୟରେ ତୀବ୍ର କୂଟନୈତିକ ମୁହାଁମୁହିଁ ସୃଷ୍ଟି ହୋଇଛି।
BY-SUBHASMITA-28.4.2026
ଆମେରିକାର ଅସ୍ତ୍ର ନିୟନ୍ତ୍ରଣ ଓ ଅପ୍ରସାର ବ୍ୟୁରୋର ସହାୟକ ସଚିବ କ୍ରିଷ୍ଟୋଫର ୟାଉ ଅଭିଯୋଗ କରିଛନ୍ତି ଯେ ଇରାନ ତାହାର ଅନ୍ତର୍ଜାତୀୟ ଦାୟିତ୍ୱ ପାଳନ କରିନାହିଁ ଏବଂ IAEA ସହିତ ସହଯୋଗରେ ବିଫଳ ହୋଇଛି। ସେ କହିଛନ୍ତି ଯେ ଏପରି ଦେଶକୁ ଦାୟିତ୍ୱପୂର୍ଣ୍ଣ ପଦବୀ ଦେବା ଅପମାନଜନକ।ଏହାର ପ୍ରତିକ୍ରିୟାରେ ଇରାନ ଏହି ଅଭିଯୋଗକୁ ରାଜନୈତିକ ଉଦ୍ଦେଶ୍ୟପ୍ରଣୋଦିତ ବୋଲି ଖଣ୍ଡନ କରିଛି। ଜାତିସଂଘରେ ଇରାନୀ ରାଷ୍ଟ୍ରଦୂତ ରେଜା ନଜାଫି କହିଛନ୍ତି ଯେ ପରମାଣୁ ଅସ୍ତ୍ର ବ୍ୟବହାର କରିଥିବା ଏକମାତ୍ର ଦେଶ ଆମେରିକା, ତେଣୁ ତାଙ୍କର ନୈତିକ ଅଧିକାର ପ୍ରଶ୍ନବାଚୀ।ଏହି ପରିସ୍ଥିତିରେ ଜାତିସଂଘ ମହାସଚିବ ଆଣ୍ଟୋନିଓ ଗୁଟେରେସ ଉଭୟ ପକ୍ଷକୁ ଶାନ୍ତି ଆଲୋଚନା ଓ ଅସ୍ତ୍ରବିରତି ପାଇଁ ଆହ୍ୱାନ କରିଛନ୍ତି। ସେ ଜୋର ଦେଇ କହିଛନ୍ତି ଯେ ସାମରିକ ସମାଧାନ କୌଣସି ସମସ୍ୟାର ଉତ୍ତର ନୁହେଁ, କେବଳ କୂଟନୀତି ମାଧ୍ୟମରେ ଶାନ୍ତି ସମ୍ଭବ।ଇରାନ ଆହୁରି ମଧ୍ୟ ହର୍ମୁଜ୍ ପ୍ରଣାଳୀ ଖୋଲିବା ସର୍ତ୍ତକୁ ଆମେରିକା ଉପରେ ଚାପ ଭାବେ ରଖିଥିବାରୁ ଜାତିସଂଘ ଚିନ୍ତା ପ୍ରକାଶ କରିଛି।ଉଲ୍ଲେଖନୀୟ ଯେ, ୧୯୮୦ ମସିହାରୁ ଆମେରିକା ଓ ଇରାନ ମଧ୍ୟରେ କୌଣସି ସିଧା କୂଟନୈତିକ ସମ୍ପର୍କ ନାହିଁ। ଦୁଇ ଦେଶ ପ୍ରାୟତଃ ଜାତିସଂଘ ମଞ୍ଚକୁ ନିଜ ମତ ରଖିବା ପାଇଁ ବ୍ୟବହାର କରୁଛନ୍ତି।
ଚର୍ଚ୍ଚା NEWS
