ପୁଣି ନ୍ୟୁଟାଉନରେ ବେପରୁଆ ଗତିର ବଳି! ବସ୍ ଧକ୍କାରେ ମୃତ୍ୟୁ ବେସରକାରୀ ସଂସ୍ଥାର ମହିଳା କର୍ମୀଙ୍କ

ସାମ୍ବାଦିକ: ପ୍ରଶାନ୍ତ ରାଉଳ
କୋଲକାତା
କୋଲକାତାର ଉପକଣ୍ଠ ନ୍ୟୁଟାଉନରେ ପୁଣି ବେପରୁଆ ଗତିତ ବଳି ଜଣେ ମହିଳା ସ୍କୁଟି ଚାଳକ। ଜନଗହଳିପୂର୍ଣ୍ଣ ବିଶ୍ୱବାଂଲା ମୋଡ ନିକଟରେ ଏକ ସରକାରୀ ବସ୍ ତାଙ୍କୁ ଧକ୍କା ଦେଇବାରୁ ତାଙ୍କର ମୃତ୍ୟୁ ହୋଇଛି। ପୋଲିସ ମୃତଦେହ ଉଦ୍ଧାର କରି ହସ୍ପିଟାଲକୁ ପଠାଇଛି। ଏହି ଘଟଣାକୁ ନେଇ ଅଞ୍ଚଳରେ ବ୍ୟାପକ ଉତ୍ତେଜନା।
ପୋଲିସ ସୂତ୍ର ଅନୁଯାୟୀ, ମୃତ ମହିଳାଙ୍କ ନାମ ବନଶ୍ରୀ ପାଲ। ସେ ନ୍ୟୁଟାଉନର ଏକ ଘରୋଇ କମ୍ପାନୀରେ କାମ କରୁଥିଲେ। ପୋଲିସ ଜଣାଇଛି ପ୍ରତିଦିନ ପରି ଗୁରୁବାର ମଧ୍ୟ କାମକୁ ଯାଉଥିବା ସମୟରେ ଏକ ଦୁର୍ଘଟଣା ଘଟିଥିଲା। ଜଣାପଡିଛି ଯେ ବିମାନବନ୍ଦର ଯାଉଥିବା ଏକ ସରକାରୀ ବସ୍ ବିଶ୍ୱବାଂଲା ଗେଟ୍ ସିଗନାଲରେ ବନଶ୍ରୀଙ୍କୁ ପଛରୁ ଧକ୍କା ଦେଇଥିଲା। ଧକ୍କା ଯୋଗୁଁ ସେ ରାସ୍ତାରେ ପଡ଼ିଯାଇଥିଲେ। ବସ୍ ଚକରେ ସେ ଚାପି ହୋଇଯାଇଥିଲେ। ସୂଚନା ପାଇବା ପରେ ପୋଲିସ ଘଟଣାସ୍ଥଳରେ ପହଞ୍ଚିଥିଲା। ମହିଳାଙ୍କୁ ରକ୍ତାକ୍ତ ଅବସ୍ଥାରେ ଉଦ୍ଧାର କରାଯାଇ ସ୍ଥାନୀୟ ଏକ ଘରୋଇ ହସ୍ପିଟାଲକୁ ନିଆଯାଇଥିଲା, ଯେଉଁଠାରେ ଡାକ୍ତର ମହିଳାଙ୍କୁ ମୃତ ଘୋଷଣା କରିଥିଲେ। ପୋଲିସ ଘଟଣାର ତଦନ୍ତ ଆରମ୍ଭ କରିଛି।
ଉଲ୍ଲେଖଯୋଗ୍ୟ ଯେ ମଙ୍ଗଳବାର ମଧ୍ୟ ନ୍ୟୁଟାଉନରେ ଏକ ସଡ଼କ ଦୁର୍ଘଟଣାରେ ଜଣେ ବ୍ୟକ୍ତିଙ୍କ ମୃତ୍ୟୁ ହୋଇଥିଲା। ମୃତକଙ୍କ ନାମ ସୁବୀର ଚକ୍ରବର୍ତ୍ତୀ। ସେ ସିସି ବ୍ଲକ୍ ବାସିନ୍ଦା। ନ୍ୟୁଟାଉନରେ ଜଣେ ଘରୋଇ ଇଞ୍ଜିନିୟରିଂ କଲେଜ ଛାତ୍ରଙ୍କ ବାଇକ୍ ଧକ୍କା ଦେବାରୁ ତାଙ୍କର ମୃତ୍ୟୁ ହୋଇଥିଲା। ପୋଲିସ ହାଓଡାର ବାସିନ୍ଦା ଯୁବକଙ୍କୁ ଗିରଫ କରିଛି।
ନ୍ୟୁଟାଉନ୍ ଭଳି ଅଞ୍ଚଳରେ, ବେପରୁଆ ଗାଡି ଚାଳନା ଯୋଗୁଁ ପଦଯାତ୍ରୀଙ୍କ ବାରମ୍ବାର ମୃତ୍ୟୁ ସୁରକ୍ଷାକୁ ନେଇ ପ୍ରଶ୍ନ ଉଠିଛି। ପୋଲିସର ବାରମ୍ବାର ଚେତାବନୀ ସତ୍ତ୍ୱେ, ଡ୍ରାଇଭରମାନେ ତାହା କର୍ଣ୍ଣପାତ କରୁନାହାଁନ୍ତି। ପୋଲିସ ସରକାରୀ ଏବଂ ଘରୋଇ ବସ୍ ଡ୍ରାଇଭରମାନଙ୍କ ସହିତ ଅନେକ ବୈଠକ କରି ସେମାନଙ୍କୁ ଏ ବିଷୟରେ ସତର୍କ କରାଇଛି। ସ୍ଥାନୀୟ ବାସିନ୍ଦାମାନେ କହିଛନ୍ତି ଯେ ଏହା ସତ୍ତ୍ୱେ, ସେମାନଙ୍କର ଚେତା ଫେରୁନାହିଁ, ଲଗାତାର ଦୁଇ ଦିନରେ ଦୁଇଟି ମୃତ୍ୟୁର ପ୍ରମାଣ।