ଭିଆଇପି ରୋଡରେ ଚଳନ୍ତା ବସ୍‌ରେ ଅଗ୍ନିକାଣ୍ଡ

ସାମ୍ବାଦିକ ପ୍ରଶାନ୍ତ ରାଉଳ
କୋଲକାତା : ବିମାନବନ୍ଦର ନିକଟବର୍ତ୍ତୀ ବ୍ୟସ୍ତବହୁଳ ଭିଆଇପି ରୋଡରେ ଏକ ବସ୍‌ରେ ଅଗ୍ନିକାଣ୍ଡ ଘଟଣାକୁ ନେଇ ଆତଙ୍କ ବ୍ୟାପିଥିଲା। କୌଣସି ମୃତାହତର ଖବର ମିଳିନାହିଁ। ଦୁଇଟି ଦମକଳ ଗାଡ଼ି ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିଲା। ଅଗ୍ନିକାଣ୍ଡରେ ସରକାରୀ ବସ୍‌ଟି ସମ୍ପୂର୍ଣ୍ଣ ଜଳିଯାଇଛି। ଅଗ୍ନିଶମ ବାହିନୀ ଅଗ୍ନିକାଣ୍ଡର କାରଣ ତଦନ୍ତ କରୁଛନ୍ତି। ପ୍ରାଥମିକ ଭାବରେ ସନ୍ଦେହ କରାଯାଉଛି ଯେ ସର୍ଟସର୍କିଟ୍ କିମ୍ବା ଅନ୍ୟ କୌଣସି ଯାନ୍ତ୍ରିକ ତ୍ରୁଟି ଯୋଗୁଁ ଅଗ୍ନିକାଣ୍ଡ ଘଟିଛି । ଜାଣିବାକୁ ମିଳିଛି ଯେ ବସ୍ ଇଞ୍ଜିନ୍‌ରୁ ଧୂଆଁ ବାହାରୁଥିବା ଦେଖି ଡ୍ରାଇଭର ସତର୍କ ହୋଇଯାଇଥିଲେ। ସେ ରାସ୍ତାରେ ବସ୍‌ଟିକୁ ଅଟକାଇ ଦେଇଥିଲେ। ତା’ପରେ, ପୋଲିସ ସହାୟତାରେ ଯାତ୍ରୀମାନଙ୍କୁ ଶୀଘ୍ର ବସ୍‌ରୁ ବାହାର କରାଯାଇଥିଲା । ଏହାର କିଛିକ୍ଷଣ ମଧ୍ୟରେ ଦାଉଦାଉ ହୋଇ ବସ୍‌ଟି ଜଳି ଉଠିଥିଲା। ପୋଲିସ ସୂତ୍ରରୁ ଜଣାପଡିଛି ଯେ, ସରକାରୀ ବସ୍‌ଟି ବାରାସତ-ଗଡିଆ ରୁଟ୍‌ରେ ଚାଲୁଥିଲା। ଏଦିନ ସକାଳେ ବସ୍‌ଟି ବାରାସତରୁ ଗଡିଆ ଯାଉଥିଲା। ବିମାନବନ୍ଦରର ୧ ନମ୍ବର ଗେଟ୍ ଅତିକ୍ରମ କରିବା ପରେ, କୈଖାଲି ଷ୍ଟପ୍ ପୂର୍ବରୁ ଏଥିରୁ ଧୂଆଁ ବାହାରିବା ଆରମ୍ଭ ହୋଇଥିଲା। ରବିବାର ଥିବାରୁ ରାସ୍ତା ଅନ୍ୟ ଦିନ ତୁଳନାରେ ଖାଲି ଥିଲା।ତେଣୁ ଡ୍ରାଇଭର ସହଜରେ ବସ୍‌ଟିକୁ ରାସ୍ତାର ବାମ ପାର୍ଶ୍ୱରେ ପାର୍କିଂ କରି ଦେଇଥିଲେ। ଡ୍ୟୁଟିରେ ଥିବା ଟ୍ରାଫିକ୍‌ ପୋଲିସ ଘଟଣାସ୍ଥଳକୁ ଦୌଡି ଯାଇଥିଲେ। ଯାତ୍ରୀମାନେ ଓହ୍ଲାଇବା ପରେ, ସେମାନେ ବସ୍‌ ଭିତରେ ଥିବା ଅଗ୍ନି ନିର୍ବାପକ ଯନ୍ତ୍ର ବ୍ୟବହାର କରି ନିଆଁକୁ ଆୟତ୍ତ କରିବାକୁ ଚେଷ୍ଟା କରିଥିଲେ। କିନ୍ତୁ ନିଆଁ ବ୍ୟାପି ଯାଇଥିଲା। ଅଗ୍ନିଶମ ବାହିନୀ ପହଞ୍ଚି ନିଆଁ ଲିଭାଇ ଦେଇଥିଲେ। ଯେହେତୁ ବସ୍‌ଟି କୋଲକାତା ଯାଉଥିବା ଲେନ୍‌ର ବାମ ପାର୍ଶ୍ୱରେ ପାର୍କିଂ କରାଯାଇଥିଲା, ତେଣୁ ଡାହାଣ ପାର୍ଶ୍ୱରେ ଯାନବାହାନ ଚଳାଚଳରେ କୌଣସି ସମସ୍ୟା ହୋଇନଥିଲା। ଟ୍ରାଫିକ୍‌ ଜାମ୍ ହୋଇନଥିଲା। ପ୍ରଶ୍ନଗତ, କିଛି ଦିନ ପୂର୍ବରୁ ସଲ୍ଟଲେକ୍‌ରେ ଏକ ଚଳନ୍ତା ପୁଲକାରରେ ନିଆଁ ଲାଗିଯାଇଥିଲା। ଲେକ୍‌ଟାଉନ୍‌ରେ ଏକ ଚଳନ୍ତା ଗାଡିରେ ନିଆଁ ଲାଗିଯାଇଥିଲା। ତେବେ, ଏହି ଘଟଣାରେ କେହି ଆହତ ହୋଇ ନଥିଲେ