ଶ୍ରାବଣର ଶେଷ ସୋମବାରରେ ତାରକେଶ୍ୱର ମନ୍ଦିରରେ ପାଣି ଢାଳିବାକୁ ଆସି ପୂଣ୍ୟାର୍ଥୀଙ୍କ ମୃତ୍ୟୁ

ସାମ୍ବାଦିକ ପ୍ରଶାନ୍ତ ରାଉଳ
କୋଲକାତା : ଶ୍ରାବଣ ମାସର ଶେଷ ସୋମବାରରେ ତାରକେଶ୍ୱରରେ ମର୍ମାନ୍ତିକ ଘଟଣା। ମନ୍ଦିରରେ ପାଣି ଢାଳିବା ସମୟରେ ଜଣେ ପୂଣ୍ୟାର୍ଥୀଙ୍କ ମୃତ୍ୟୁ ଘଟିଛି। ମୃତକଙ୍କ ନାମ ଅମିତ ପାକଡେ (୩୫)। ମୃତକଙ୍କ ଘର ହାୱଡା ଜିଲ୍ଲାର ବାଲି ଅଞ୍ଚଳର ବୋଲି ଜଣାପଡିଛି। ଏଦିନ ସକାଳେ ୧୦ ଜଣ ବନ୍ଧୁ ଏବଂ ସମ୍ପର୍କୀୟ ତାରକେଶ୍ୱର ମନ୍ଦିରରେ ପାଣି ଢାଳିବା ପାଇଁ ବାଇକ୍ ଯୋଗେ ଶେଓରାଫୁଲି ଆସିଥିଲେ। ସେମାନେ ଶେଓରାଫୁଲିର ନିମାଇଁ ତୀର୍ଥ ଘାଟରୁ ପାଣି ନେଇ ବାଇକ୍ ଯୋଗେ ତାରକେଶ୍ୱର ଅଭିମୁଖେ ବାହାରିଥିଲେ। ମଝିରେ ସେମାନେ ହରିପାଲର ମାଲିଆ ନିକଟରେ ଟିଫିନ୍ ମଧ୍ୟ କରିଥିଲେ। ତାପରେ, ତାରକେଶ୍ୱର ମନ୍ଦିରରେ ପ୍ରବେଶ କରିବା ପୂର୍ବରୁ, ବାଜିତପୁର ମୋଡରେ ଅମିତ ନାମକ ବ୍ୟକ୍ତି ହଠାତ୍ ଅସୁସ୍ଥ ହୋଇ ପଡ଼ିଲେ। ତାଙ୍କୁ ତାରକେଶ୍ୱର ଗ୍ରାମୀଣ ଡାକ୍ତରଖାନାକୁ ନିଆଯାଇଥିଲା, ଯେଉଁଠାରେ ଚିକିତ୍ସା ଆରମ୍ଭ ହେବାର କିଛି ସମୟ ପରେ ତାଙ୍କର ମୃତ୍ୟୁ ହୋଇଥିଲା। ସୂଚନାଯୋଗ୍ୟ ଯେ ଚଳିତ ବର୍ଷ ଲକ୍ଷଧୀକ ତୀର୍ଥଯାତ୍ରୀ ତାରକେଶ୍ୱରକୁ ଆସିଛନ୍ତି। ତେବେ, ଏହା ପ୍ରଥମ ଥର ଯେ କୌଣସି ତୀର୍ଥଯାତ୍ରୀ ଅସୁସ୍ଥତା ଯୋଗୁଁ ମୃତ୍ୟୁବରଣ କରିଛନ୍ତି। ଏହି ଘଟଣାକୁ ନେଇ ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି ହୋଇଛି