ଶୋଇଥିବା ଅବସ୍ଥାରେ ପାଚେରୀ ପଡିବାରୁ ଭାଇଭଉଣୀଙ୍କ ମୃତ୍ୟୁ

ସାମ୍ବାଦିକ ପ୍ରଶାନ୍ତ ରାଉଳ
କୋଲକାତା: ବର୍ଷା ରାତିରେ ଏକ ଦୁଃଖଦ ଘଟଣା ଘଟିଗଲା। ରାଜ୍ୟ ପଶ୍ଚିମ ବଙ୍ଗର ଜଲ ପାଇ ଗୁଡ଼ି ଜିଲ୍ଲା ସ୍ଥିତ ସିଲିଗୁଡ଼ି ସଂଲଗ୍ନ ସାହୁଡାଙ୍ଗିର ପାଘଲୁପଡାରେ ଶୋଇଥିବା ସମୟରେ ପଡ଼ୋଶୀ ଘରର କଂକ୍ରିଟ୍ ପାଚେରୀ ଭୁଶୁଡ଼ି ପଡ଼ିବାରୁ ଦୁଇ ଛୋଟ ଭାଇଭଉଣୀଙ୍କର ମୃତ୍ୟୁ ଘଟିଛି। ମୃତକମାନେ ହେଉଛନ୍ତି ତିନି ବର୍ଷର ମଧୁମିତା ମହନ୍ତ ଏବଂ ଦେଢ଼ ବର୍ଷର ଦେବାୟନ ମହନ୍ତ। ପରିବାର ସୂତ୍ରରୁ ଜଣାପଡିଛି ଯେ, ମଙ୍ଗଳବାର ରାତିରେ ଅଞ୍ଚଳରେ ପ୍ରବଳ ବର୍ଷା ହୋଇଥିଲା। ଦିନମଜୁରିଆ ପରିମଳ ମହନ୍ତ କାମରୁ ଫେରି ତାଙ୍କ ସ୍ତ୍ରୀ ରିଙ୍କି ମହନ୍ତ ଏବଂ ସେମାନଙ୍କର ଦୁଇ ସନ୍ତାନଙ୍କ ସହିତ ରାତ୍ରୀଭୋଜନ କରିଥିଲେ। ଏହା ପରେ, ମା’ ପିଲାମାନଙ୍କୁ ଏକ ଟିଣ ଘରେ ଶୁଆଇ ଦେଇଥିଲେ। ହଠାତ୍, ରାତିରେ ପଡ଼ୋଶୀ ଘରର ପୁରୁଣା କଂକ୍ରିଟ୍ ପାଚେରୀ ଭୁଶୁଡ଼ି ପଡ଼ି ସେମାନଙ୍କ ଘର ଉପରେ ପଡ଼ିଯାଇଥିଲା। ମୁହୂର୍ତ୍ତକ ମଧ୍ୟରେ, ଦୁଇ ଶିଶୁ ସେହି ପାଚେରୀ ତଳେ ଚାପି ହୋଇଯାଇଥିଲେ। ପରିବାରର ଭୟଭୀତ ଚିତ୍କାର ଶୁଣି ପଡ଼ୋଶୀମାନେ ଧ୍ବଂସାବଶେଷ ହଟାଇବା ପାଇଁ ଧାଇଁ ଆସିଥିଲେ, ଶିଶୁମାନଙ୍କୁ ଉଦ୍ଧାର କରି ସିଲିଗୁଡ଼ି ଜିଲ୍ଲା ହସ୍ପିଟାଲକୁ ନେଇଯାଇଥିଲେ। କିନ୍ତୁ, କର୍ତ୍ତବ୍ୟରତ ଡାକ୍ତର ଉଭୟଙ୍କୁ ମୃତ ଘୋଷଣା କରିଥିଲେ। ଏହି ଘଟଣା ପରିବାର ସଦସ୍ୟଙ୍କୁ ନିର୍ବାକ କରିଦେଇଛି ଏବଂ ସମଗ୍ର ଅଞ୍ଚଳ ଶୋକରେ ସ୍ତବ୍ଧ ହୋଇଯାଇଛି