ସାମ୍ବାଦିକ- ରାଜୀବ କୁମାର ବେହେରା
ତାରିଖ-୧୮-୦୫-୨୦୨୬
ମୟୁରଭଞ୍ଜ : ମୟୁରଭଞ୍ଜ ଜିଲ୍ଲା ଶିମିଳିପାଳ ପାଦଦେଶ ଉଦଳା ବନାଞ୍ଚଳ ଅଧୀନ ଚୁଳିଆପୁଷି ନିକଟରେ ଅଜଣା ଗାଡ଼ି ଧକ୍କାରେ ଏକ ହରିଣ ଗୁରୁତର ଭାବେ ଆହତ ହୋଇଥିବା ଘଟଣା ସାମ୍ନାକୁ ଆସିଛି। ଧକ୍କା ଦେଇ ଗାଡ଼ିଟି ଘଟଣାସ୍ଥଳରୁ ଫେରାର ହୋଇଯାଇଥିବା ସୂଚନା ମିଳିଛି। ସ୍ଥାନୀୟ ଲୋକଙ୍କ ଠାରୁ ଖବର ପାଇ ଉଦଳା ବନ ବିଭାଗର କର୍ମଚାରୀମାନେ ତୁରନ୍ତ ଘଟଣାସ୍ଥଳରେ ପହଞ୍ଚି ଆହତ ହରିଣଟିକୁ ଉଦ୍ଧାର କରିଥିଲେ। ପରେ ହରିଣଟିକୁ ଉଦଳା ପ୍ରାଣୀ ଚିକିତ୍ସାଳୟକୁ ଚିକିତ୍ସା ପାଇଁ ନିଆଯାଇଥିଲା। ଚିକିତ୍ସା ସମୟରେ ହରିଣଟିର ଗୋଟିଏ ଗୋଡ଼ ଭାଙ୍ଗିଯାଇଥିବା ଜଣାପଡ଼ିଛି। ପ୍ରାଥମିକ ତଦନ୍ତରୁ ଜଣାପଡ଼ିଛି ଯେ, ହରିଣଟି ପାଟପୁର ଜଙ୍ଗଲରୁ ଖାଦ୍ୟ ଅନ୍ୱେଷଣରେ ବାହାରକୁ ବୁଲି ବାକୁ ବାହାରି ଆସିଥିବା ବେଳେ ସକାଳ ସମୟରେ ଚୁଳିଆପୁଷି ଗୋରୁହାଟ ନିକଟରେ ଦୁର୍ଘଟଣାର ସିକାର ହୋଇଥିଲା। ବନ ବିଭାଗ ପକ୍ଷରୁ ହରିଣଟିର ବୟସ ପ୍ରାୟ ୫ ବର୍ଷ ଏବଂ ଓଜନ ପାଖାପାଖି ପ୍ରାୟ ୨୦ କିଲୋ ହୋଇଥିବା ସୂଚନା ମିଳିଛି।
ବର୍ତ୍ତମାନ ଉଦଳା ବନ ବିଭାଗ ତତ୍ତ୍ୱାବଧାନରେ ହରିଣଟିର ଚିକିତ୍ସା ଜାରି ରହିଛି ଏବଂ ତାହାର ଅବସ୍ଥା ସ୍ଥିର ଥିବା ଜଣାପଡ଼ିଛି। ହରିଣଟି ସମ୍ପୂର୍ଣ୍ଣ ସୁସ୍ଥ ହେବା ପରେ ସୁରକ୍ଷିତ ଭାବେ ଜଙ୍ଗଲରେ ଛାଡ଼ି ଦିଆଯିବ ବୋଲି ଉଦଳା ବନାଞ୍ଚଳ ରେଞ୍ଜର ସୁଶାନ୍ତ କୁମାର ଦେ ସୂଚନା ଦେଇଛନ୍ତି। ଏହି ଘଟଣା ପରେ ବନାଞ୍ଚଳ ରାସ୍ତାରେ ସତର୍କତାର ସହ ଗାଡ଼ି ଚଳାଇବାକୁ ସାଧାରଣରେ ଦାବି ହେଉଛି।
