ଉଦଳା: (ରାଜୀବ କୁମାର ବେହେରା) – ଆଜିର ଏହି ଆଧୁନିକ ଯୁଗରେ ଆଜିବି ଏମିତି ଗାଁ ରହିଛି ଟୋପେ ପାଣି ପାଇଁ ବାଜିରେ ଲାଗିଛି ଜୀବନ, ଜଳହିଁ ଜୀବନ, କିନ୍ତୁ ଏଠି ପାଣି ନାହିଁ ପାଣି ପାଇଁ ହା ହା କାର ପଥର ଖୋଲ ରୁ ବହି ଆସୁଥିବା ଝର ଚୁଆ ପାଣି ଶୋଷ ମେଣ୍ଟାଉଛି, ଦୁଃଖ ଆଉ ପରୀତାପର ବିଷୟ ସ୍ଥାନୀୟ ପ୍ରଶାସନ ନିଘୋଡ଼ ନିଦରେ, ଦିନ ପରେ ଦିନ ବିତି ଚାଲିଛି, ସରକାର ପରିବର୍ତ୍ତନ ହୋଇଛି, ହେଲେ ଗ୍ରାମର ପାଣି ଯନ୍ତ୍ରଣା ଆହୁରି ଜଟିଳ ହୋଇଯାଇଛି l କେବେ ଏଥି ପ୍ରତି ଅଧିକାରୀଙ୍କ ନଜର ପଡିବ, କେବେ ସରକାର ଦୁଃଖ ବୁଝିବେ, ଏହା ଏବେ ସାଧାରଣରେ ? ଯେଉଁ ଦେଶ ଚନ୍ଦ୍ରରେ ପହଞ୍ଚିଛି, ଡିଜିଟାଲ ଇଣ୍ଡିଆର ସ୍ୱପ୍ନ ଦେଖାଉଛି, ସେହି ଦେଶର ଏକ ଗାଁରେ ଆଜି ବି ମଣିଷ ଟୋପେ ପାଣି ପାଇଁ ପାହାଡ଼ ଝରଣା ଉପରେ ନିର୍ଭର କରୁଛି। ମୟୁରଭଞ୍ଜ ଜିଲ୍ଲା କପ୍ତିପଦା ବ୍ଲକ ଅଧୀନ ଜାମୁଢିଆ ପଞ୍ଚାୟତର ମାଙ୍କିଡିଆ ସାହିର ଚିତ୍ର ବିକାଶର ସମସ୍ତ ଦାବିକୁ ଚ୍ୟାଲେଞ୍ଜ କରିଛି।
ଯେଉଁ ଗାଁକୁ “ଆଦର୍ଶ ଗ୍ରାମ” ବୋଲି କୁହାଯାଉଛି, ସେହି ଗାଁରେ ବିଶୁଦ୍ଧ ପାନୀୟ ଜଳ ଆଜି ବି ସ୍ୱପ୍ନ ହୋଇ ରହିଯାଇଛି। ଗ୍ରାମବାସୀଙ୍କ ପାଇଁ ପାହାଡ଼ ଭିତରୁ ବାହାରୁଥିବା ଚୁଆ ଓ ଝର ପାଣି ହିଁ ଏକମାତ୍ର ଭରସା। ବର୍ଷ ବର୍ଷ ଧରି ଅଭିଯୋଗ, ନିବେଦନ ଓ ପ୍ରତିଶ୍ରୁତିର ଲମ୍ବା ତାଲିକା ଥିଲେ ମଧ୍ୟ ସମସ୍ୟାର ସମାଧାନ ହୋଇପାରିନାହିଁ।
ଏହା କେବଳ ଜଳ ସଙ୍କଟର କାହାଣୀ ନୁହେଁ, ବରଂ ବ୍ୟବସ୍ଥାର ବିଫଳତାର ଜୀବନ୍ତ ଉଦାହରଣ। ଯେଉଁଠି ପାଣି ପାଇଁ ଲୋକେ ଦିନକୁ ଦିନ ସଂଘର୍ଷ କରୁଛନ୍ତି, ସେଠାରେ ବିକାଶର ବଡ଼ ବଡ଼ ଦାବି କେବଳ ପ୍ରଚାରରେ ସୀମିତ ହୋଇଯାଇଛି।
ଦୂଷିତ ଝର ପାଣି ପିଇ ଅନେକ ଲୋକ ବିଭିନ୍ନ ରୋଗରେ ପୀଡ଼ିତ ହେଉଥିବା ଅଭିଯୋଗ ରହିଛି। ହେଲେ ପ୍ରଶାସନର ନିରବତା ଓ ଜନପ୍ରତିନିଧିଙ୍କ ଉଦାସୀନତା ଲୋକଙ୍କ କ୍ଷୋଭକୁ ଆହୁରି ବଢ଼ାଇଛି।
ସ୍ୱାଧୀନତାର ୭୫ ବର୍ଷ ପରେ ଯଦି ଜଣେ ନାଗରିକଙ୍କୁ ପିଇବା ପାଣି ପାଇଁ ପାହାଡ଼ ଚଢ଼ିବାକୁ ପଡ଼ୁଛି, ତାହେଲେ ବିକାଶର ଏହି ମଡେଲକୁ ଇତିହାସ କେମିତି ମନେ ରଖିବ?
ସବୁଠାରୁ ବଡ଼ କଥା ହେଉଛି, ବାରମ୍ବାର ଜନପ୍ରତିନିଧି ଓ ପ୍ରଶାସନିକ ଅଧିକାରୀଙ୍କୁ ଅଭିଯୋଗ କରାଯାଉଥିଲେ ମଧ୍ୟ ସମସ୍ୟାର ସ୍ଥାୟୀ ସମାଧାନ ହୋଇପାରୁନାହିଁ। ପ୍ରତିଶ୍ରୁତି ମିଳୁଛି, କିନ୍ତୁ ବାସ୍ତବରେ ପରିସ୍ଥିତି ଯଥାପୂର୍ବଂ ରହିଛି।
ଆଜି ପ୍ରଶ୍ନ ଉଠୁଛି—ଏହି ମାଙ୍କିଡିଆ ସାହିର ଲୋକେ କଣ ଏହି ଦେଶର ନାଗରିକ ନୁହଁନ୍ତି? ସେମାନଙ୍କର କଣ ବିଶୁଦ୍ଧ ପାଣି ପିଇବାର ଅଧିକାର ନାହିଁ? ଯଦି ଅଛି, ତେବେ ଏହି ଅବହେଳା ପାଇଁ ଦାୟୀ କିଏ?
ଇତିହାସ କେବଳ ବିକାଶର କାହାଣୀ ଲେଖେନାହିଁ, ଅବହେଳାର ଅଧ୍ୟାୟ ମଧ୍ୟ ଲିପିବଦ୍ଧ କରେ। ମାଙ୍କିଡିଆ ସାହିର ଏହି ଜଳ ଯନ୍ତ୍ରଣା ସେହି ଅବହେଳାର ଏକ ଜ୍ୱଳନ୍ତ ଉଦାହରଣ।
ଦୂଷିତ ପାଣି ବ୍ୟବହାର ଯୋଗୁଁ ବିଭିନ୍ନ ରୋଗରେ ଆକ୍ରାନ୍ତ ହେଉଥିବା ବେଳେ ଗ୍ରାମବାସୀଙ୍କ ମଧ୍ୟରେ ବଢ଼ୁଛି ଅସନ୍ତୋଷ। ବିକାଶର ବଡ଼ ବଡ଼ ଦାବି ଭିତରେ ଏହି ଗ୍ରାମର ଦୁଃଖଦ ଚିତ୍ର ଅନେକ ପ୍ରଶ୍ନ ଉଠାଇଛି।
ଏବେ ଦେଖିବାକୁ ବାକି ରହିଲା, ପ୍ରଶାସନ କେବେ ଏହି ଗ୍ରାମର ଜଳ ସମସ୍ୟା ପ୍ରତି ଗୁରୁତ୍ୱ ଦେଉଛି ଏବଂ କେବେ ଲୋକଙ୍କୁ ବିଶୁଦ୍ଧ ପାନୀୟ ଜଳର ସୁବିଧା ମିଳୁଛି।
Related Posts
