‘ଡାହଣୀ’ ଅପବାଦରେ ବୃଦ୍ଧାଙ୍କୁ ହତ୍ୟା: ପୋଖରୀରୁ ମିଳିଲା ଦେହ

ସାମ୍ବାଦିକ: ପ୍ରଶାନ୍ତ ରାଉଳ
କୋଲକାତା
‘ଡାହାଣୀ’ ଅପବାଦରେ ଅଶୀପର ବୃଦ୍ଧାଙ୍କୁ ହତ୍ୟା! ଏହି ଚାଞ୍ଚଲ୍ୟକର ଘଟଣା ପୂର୍ବ ବର୍ଦ୍ଧମାନର ମେମାରିରେ ଘଟିଛି। ଏହି ଘଟଣାରେ ପୋଲିସ ଚାରି ଜଣଙ୍କୁ ଗିରଫ କରି ପଚରାଉଚରା କରିଛି। ଏହି ଘଟଣାକୁ ନେଇ ସ୍ଥାନୀୟ ବାସିନ୍ଦାଙ୍କ ମଧ୍ୟରେ କ୍ରୋଧ ଏବଂ ଆତଙ୍କ ସୃଷ୍ଟି କରିଛି। ମୃତକଙ୍କ ନାମ ଲକ୍ଷ୍ମୀ ହେମ୍ବ୍ରମ।
ପୋଲିସ ଏବଂ ସ୍ଥାନୀୟ ସୂତ୍ର ଅନୁଯାୟୀ, ଘଟଣାଟି ମେମାରି ଥାନାର ଦେବୀପୁର ଗ୍ରାମପଞ୍ଚାୟତର ଗୌରୀପୁର ଗାଁରେ ଘଟିଛି। ୮୪ ବର୍ଷୀୟ ଲକ୍ଷ୍ମୀ ହେମ୍ବ୍ରମ ସେହି ଗାଁର ଘରେ ଏକା ରହୁଥିଲେ। ଶୁକ୍ରବାର ସକାଳେ ଘର ପାଖରେ ଥିବା ଏକ ପୋଖରୀରେ ବୃଦ୍ଧାଙ୍କ ମୃତଦେହ ଭାସୁଥିବାର ଦେଖାଯାଇଥିଲା। ଏହି ଘଟଣାକୁ ନେଇ ସ୍ଥାନୀୟ ବାସିନ୍ଦାଙ୍କ ମଧ୍ୟରେ ଆତଙ୍କ ବ୍ୟାପିଯାଇଥିଲା। ଖବର ପାଇ ମେମାରି ଥାନାର ପୋଲିସ ଘଟଣାସ୍ଥଳକୁ ଯାଇଥିଲା। ପୋଖରୀରୁ ଉଦ୍ଧାର କରାହୁଏ ମୃତଦେହ।
ବୃଦ୍ଧାଙ୍କ ଶରୀରରେ ଅନେକ ସ୍ଥାନରେ ଆଘାତ ଚିହ୍ନ ଅଛି। କେବଳ ସେତିକି ନୁହେଁ, ବୃଦ୍ଧାଙ୍କ ଘରୁ ପୋଖରୀକୁ ଯାଇଥିବା ମାଟି ରାସ୍ତାରେ କିଛି ଟାଣି ନେବାର ମଧ୍ୟ ଚିହ୍ନ ରହିଛି। ଅଭିଯୋଗ ହୋଇଛି ଯେ ବୃଦ୍ଧାଙ୍କୁ ଘର ସାମ୍ନାରେ ହତ୍ୟା କରାଯାଇ ତାଙ୍କ ମୃତଦେହକୁ ପୋଖରୀରେ ଫିଙ୍ଗି ଦିଆଯାଇଛି। କେବଳ ସେତିକି ନୁହେଁ, ସ୍ଥାନୀୟ ବାସିନ୍ଦାମାନେ ଅଭିଯୋଗ କରିଛନ୍ତି ଯେ ବୃଦ୍ଧାଙ୍କୁ ଡାହଣୀ ଅପବାଦ ଦିଆଯାଇ ହତ୍ୟା କରାଯାଇଛି। ପୋଲିସ ତଦନ୍ତ ଆରମ୍ଭ କରିଛି ଏବଂ ଅଞ୍ଚଳରୁ ଚାରି ଜଣଙ୍କୁ ଗିରଫ କରି ପଚରାଉଚରା ପାଇଁ ଥାନାକୁ ନେଇଛି। ମୃତଦେହ ବ୍ୟବଚ୍ଛେଦ ପାଇଁ ପଠାଯାଇଛି।